«Meshit» sóziniń qazaq tilindegi qoldanysy men mán-maǵynasy «Sájde», «Qulshylyq jasaıtyn oryn» degendi bildiredi.
Meshit – musylman qaýymnyń Jaratýshy Allaǵa kirshiksiz qulshylyq etip, táýbege keletin, janyna jubanysh tabatyn, duǵa tileıtin minájat úıi. Meshit – qulshylyq qana emes, bilimniń, tárbıeniń de kıeli ordasy. Bul meshittiń musylman balasy úshin qanshalyqty úlken mańyzǵa ıe ekenin kórsetedi.
Katonqaraǵaı aýdanyna qarasty Aqsý aýylynda boı kótergen jańa meshittiń ashylý saltanaty boldy. Alǵashqy quttyqtaý sózdi Qazaqstan musylmandary dinı basqarmasynyń Shyǵys Qazaqstan oblysy boıynsha bas ımamy Ermek qajy Tasbolatuly aldy. Ol óziniń sózinde osy meshittiń boı kóterýine tikeleı yqpal jasaǵan Azamat Nursultanovqa rızashylyǵyn bildire kele, oǵan alǵyshat tapsyrdy. Basqa sóz sóılegender de aýyldastaryn jańa meshittiń ashylýymen quttyqtady. Sońynda arýaqtarǵa Quran baǵyshtaldy.
Osy meshit salynyp jatyr eken dep estigen kezde qýanyshymda shek bolmady. Meshittiń salynýyna kóp kúsh-jiger jumsap, bastan-aıaq qamqorshy bolǵan Azamat pen Ashat baýyrlarymyzǵa alǵysymyz sheksiz. Osyndaı kórikti ǵımarattyń boı kóterýine jan-jaqty qoldaý kórsetken barlyq aýyl adamdaryna da Allanyń nury jaýsyn degim keledi.
Búginde kóptiń tilegi qabyl bolyp, kúmbezi kók tiregen záýlim meshitimizdiń esigi barlyq ısi musylman qaýymy úshin aıqara ashyq. Al meshit salýdyń saýaby qanshalyqty úlken ekeni jaıynda Alla Taǵala Quran Kárimde: «Alla Taǵalanyń meshitterin tek Allaǵa jáne aqıret kúnine ıman keltirgen, namaz oqyǵan, zeketin bergen jáne Alladan basqa eshkimnen qoryqpaıtyndar ǵana salady», dep aıtylǵan. Aqsý aýylyndaǵy eńseli meshitimiz dinimizdiń órkendeýi úshin qyzmet etip, halqymyzdy ımandylyqqa tárbıeleı bersin.
Saırash TOQPAEVA,
Gerasımov orta mektebiniń muǵalimi
Shyǵys Qazaqstan oblysy,
Ulan aýdany