Ystyqkóldegi demalystan qaıtyp kele jatqan eki qazaqstandyq jol apatyna ushyrady, dep habarlaıdy Egemen.kz.
Qyrǵyzstan IIM jol qaýipsizdigin qamtamasyz etý bas basqarmasy baspasóz qyzmeti málimetinshe, jol-kólik oqıǵasy 2 tamyzda saǵat 15.20 shamasynda Shyrpyqty jáne Torý-Aıgyr aýyldary arasynda bolǵan.
«Balyqshy - Ananevo - Qarakól tasjolynda Opel Zafira kóliginiń júrgizýshisi rólge ıe bola almaı qalǵan. Aldyn ala málimet boıynsha, kóliktiń dóńgelegi jarylǵan. Saldarynan 1982 jáne 1966 jyly týǵan jolaýshylar oqıǵa ornynda qaza boldy. Al júrgizýshi men 2001 jyly týǵan egiz túrli jaraqatpen Balyqshy qalalyq aýrýhanasynyń jansaqtaý bólimine jetkizildi», delingen vedomstvo habarlamasynda.
Júrgizýshi esin jımastan, aýrýhanada kóz jumǵan.
«Qazaqstandyqtar Qara-Balta qalasyndaǵy týystaryna kelgen, sol jerden úsh kólikpen Ystyqkól oblysyna demalýǵa ketken. Qaıtar jolda úsh kólik te kolonnamen júrip, ortasynda Opel Zafira bolǵan. Apat saldarynan kólik aýdarylyp qaldy», dedi baspasóz qyzmetindegiler.
Bul derek Ystyqkól aýdany ishki ister organdaryna tirkelip, tıisti saraptamalar taǵaıyndaldy. Tergeý amaldary júrgizilip jatyr.