Aýyl balalarynyń aýyzbirshiligin nyǵaıtyp, berekege uıytqan jasóspirimder arasyndaǵy respýblıkalyq IV jazǵy oıyndar dodasy óz máresine jetti. Taldyqorǵanda tý kótergen jalyndy jastar 3 kún qatarynan baq synady. Dúbirge bólegen baıraqty básekeniń jabylý saltanatyna Jetisý oblysy ákiminiń orynbasary Rýstam Álı qatysty.
On kún boıy kil myqtyny anyqtaýǵa baryn salǵan aýyldyń jasóspirim sportshylary aıanyp qalmady. Sporttyń 12 túrinen 14 oblystyń komandasy baq synaǵan báseke óte tartysty ótti. Bolashaǵynan úmit kúttiretin jas sportshylardyń ósip kele jatqanyna kýá boldyq. Jan alyp, jan berisken jarysta Jetisý oblysynyń sportshylary namysty qoldan bermedi. Ár básekede joǵary satyǵa shyǵý úshin baryn saldy. Qorjyndaryna upaı enshilep, jalpy komandalyq esepte birinshi orynǵa qol jetkizý basty maqsattary boldy. Sonymen ár sport túriniń nátıjesine keler bolsaq, Jetisý oblysy mynadaı kórsetkishke qol jetkizdi:
Oblys qurama komandasy voleıboldan qyzdar arasynda – 2-oryn, shaǵyn-fýtbol – 3-oryn, erkin kúresten – 3-oryn, grek-rım kúresinen – 2-oryn, dzıýdodan – 1-oryn, erkin kúresten – 3-oryn, basketboldan qyzdar – 2-oryn, uldar – 3-oryn, kógaldaǵy hokkeı qyzdar men uldar – 1-oryn ıelendi. Bul jetistikterdiń árqaısyna jekeleı upaı beriledi. Jalpy, jarystyń jıyntyǵy boıynsha 276 upaı jınaǵan Jetisý oblysy respýblıkalyq aýyl jasóspirimderiniń IV jazǵy oıyndarynyń jeńimpazy atandy. Ekinshi orynǵa 257 upaı jınaǵan Almaty oblysy qol jetkizse, úshinshi oryndy 241 upaı jınaǵan Túrkistan oblysy enshiledi.
Tórt jylda bir bolatyn respýblıkalyq aýyl jasóspirimderiniń IV jazǵy oıyndarynyń jabylý saltanatynda Jetisý oblysy ákiminiń orynbasary Rýstam Álı jarysqa qatysqan barlyq komandaǵa alǵysyn bildirip, jeńimpazdardy arnaıy kýbokpen jáne medaldarmen marapattady. Jetisý oblysy dene shynyqtyrý jáne sport basqarmasynyń basshysy Almat Úshkempirov 2026 jyly bolatyn respýblıkalyq aýyl jasóspirimderiniń V jazǵy oıyndarynyń baıraǵyn Aqtóbe oblysynyń ókiline saltanatty túrde tabys etti.
Jetisý oblysy