Tennısten Qazaqstan jasóspirimder quramasy Chehııanyń Prosteev qalasynda ótip jatqan komandalyq álem chempıonatynda byltyrǵy jeńimpaz – Italııa quramasyn tize búktirdi.
Kortqa birinshi bolyp jerlesterimizden Danıel Tazabekov shyǵyp, Salvatore Tartalonemen sheberlik baıqasty. Alǵashqy partııada Danıel qarsylasyna birde-bir geım bergen joq – 6:0. Ekinshi settiń besinshi geıminde breık jasap, sol basymdyǵyn match sońyna deıin saqtap qaldy – 6:3. Zańǵar Nurlanuly men Antonıo Marılıano da asa tartysty match ótkizdi. Birinshi partııada ıtalııalyq sportshynyń baǵy jandy – 6:4. Ekinshisinde de ol «á» degennen 3:1 esebimen alǵa shyqty. Degenmen odan keıingi setterde Zańǵar tarazy basyn teńestirip qana qoımaı, partııany óz paıdasyna jazdy – 6:4. Úshinshi, sheshýshi partııanyń segizinshi geıminde qazaqstandyq tennısshi breık jasap, sodan keıin ózi dop bergende matchtyń núktesin qoıdy – 6:3.
Osylaısha, álem chempıondaryn utqan Qazaqstan jasóspirimder quramasy tarıhta alǵash ret dúnıejúzilik dodanyń shırek fınalyna shyǵyp, úzdik segiz komandanyń qataryna endi. Jerlesterimiz toptyq kezeńniń alǵashqy matchynda Ekvadorǵa 1:2 esebimen jol berse, kelesi kúni Argentınany dál osyndaı eseppen jeńgen edi.