Nur-Sultan qalasynyń ákimi Altaı Kólginov Instagram paraqshasynda kezekti biregeı ortalyq ashylǵanyn málim etti, dep habarlaıdy Egemen.kz.
«Elordada kezekti biregeı ortalyq ashyldy. Erekshe qajettilikteri bar balalardy tárbıelep otyrǵan otbasylar úshin «Baqytty shańyraq» ortalyǵy (R.Qoshqarbaev dańǵyly, 60) óz esigin aıqara ashty. Bul – esep boıynsha osymen tórtinshi ortalyq. Onyń ereksheligi – múmkindigi shekteýli balalarǵa ǵana emes, olardyń analaryna da qajet kómek túrleri kórsetiledi», delingen jazbada.
Munda erekshe balalardyń analaryna qaıta bilim alý, biliktiligin arttyrý kýrstarynan ótý, jumysqa ornalasý boıynsha jerdem beriledi. Sol sııaqty psıhologııalyq kómek te kórsetiledi. «Baqytty shańyraq» ortalyǵy múmkindigi shekteýli 600-den astam balany qamtıdy.
«Memleket basshysynyń tapsyrmasy boıynsha erekshe qajettilikteri bar balalarǵa jan-jaqty jaǵdaı jasaý máselesine erekshe kóńil bólinedi. Sońǵy jyldary ońaltý ortalyqtarynyń jelisi aıtarlyqtaı artty. Osylaısha, 15-ten astam ortalyq ashyldy, olar 4 myńǵa jýyq múmkindigi shekteýli balany qamtydy. Ońaltý ortalyqtary men kómek kórsetý ortalyqtary erekshe balalardyń ata-analary úshin aýadaı qajet. Sebebi mundaı ortalyqtar balanyń densaýlyǵyn jaqsartýǵa jáne olardy áleýmettendirýge kómektesedi.
Máselen, osyǵan deıin «Asyl Mıras», «Orda», «Balam-Aı» ońaltý ortalyqtary, sol sııaqty №1 qalalyq balalar aýrýhanasy bazasynda «Qamqorlyq» ońaltý ortalyǵy ashyldy. Olar DSP, aýtızm, daýn sındromy jáne júrek talmasy sekildi dıagnozy bar balalardy ońaltýmen aınalysady», dep jazdy ákim.
Sondaı-aq biliktilikti arttyrý jáne jumysqa ornalastyrý máselesine arnalǵan ortalyqtar, belsendi uzaq ómir súrý ortalyǵy (Ardagerler úıi), áleýmettik ortalyqtar («Januıa» otbasy ınstıtýtyn qoldaý ortalyǵy), kórý qabileti buzylǵan balalarǵa arnalǵan mamandandyrylǵan balabaqsha (Saryarqa aýdany, Kenesary kóshesi 9/1) ashyldy.