Ázirge besinshi oryndamyz

Beısenbi jáne juma kúnderi qor­jy­nymyz taǵy birneshe júl­demen tolyqty. Aýyr atletter saıysynda 55 kılo salmaqta­ǵy Arlı Chonteıge teń keler esh­kim tabylmady. Álem chempıony qossaıystyń qorytyndysy boıynsha 253 (114+139) kılony eńserip, jeńis tuǵyrynyń eń bıik satysyna kóterildi. Komandalyq áriptesiniń jeńis­ti jolyn Zýlfııa Chınshanlo jal­ǵastyrdy. 59 kılo salmaqta synǵa túsken Olımpııa oıyndarynyń qola júldegeri, álemniń úsh dúrkin chempıony 220 (95+125) kılolyq ziltemirdi tik kóterip, altynnan alqa taqty. Al 61 kılo salmaqta óner kórsetken О́tepbergen Álıev qola medaldy moınyna ildi.

Taekvondoshylar tartysynda 73 kılo salmaqtaǵy Jansel Denız úshinshi orynǵa taban tiredi. Azııa oıyndary men Dúnıejúzilik Ýnıversıadanyń kúmis júldegeri tek túrkııalyq Sýde Ýzýnchavdar men lıvandyq Selman Vardtan ǵana qalyp qoıdy. Taǵy bir qola medaldy Iordanııanyń ókili Rama Abo-Alrýb enshiledi. Áıel­der kú­resinen ótken jarysta Elena Shaly­gınanyń (65 kılo) asqan sheberligine tánti boldyq. 35 jas­taǵy ardager sportshy barlyq qarsylasyn qapy qal­dyryp, bas júldeni oljalady. Grek-rım kúresi sheberleriniń básekesinde Amanǵalı Bekbolatov (55 kılo) qola medaldy ıemdendi.

Senbi kúni Qazaqstan qurama­synyń qorjynyna alǵashqy júldeni aýyr atlet Alekseı Chýrkın (73 kılo) saldy. Qossaıysta 315 (145+170) kılony eńsergen ol ekinshi satyǵa jaıǵasty. Kóp ke­shikpeı Anadoly elinen taǵy bir qýanyshty habar jetti. 50 metrlik qashyqtyqqa brass ádisimen júzýde Adelaıda Pchelınseva aldyna jan salmaı, Túrkııa kóginde Qazaqstannyń ánuranyn taǵy bir márte shyrqatty.

Jeksenbi kúnge deıingi jaǵdaı­ǵa zer salsaq, Qazaqstan qura­ma­­sy 13 altyn, 9 kúmis jáne 21 kú­mis medalmen ja­lpy esepte besin­shi orynda keledi. Bar­lyǵy – 43 júlde. Aldymyzda – Túr­kııa (60 altyn+59 kúmis+50 qola), Iran (27+23+23), О́zbekstan (20+17+26) jáne Ázerbaıjan (13+14+15) qu­ra­malary. Esterińizge sala keteıik, Islam yntymaqtastyǵy oıyn­­dary 18 tamyzda óz máresine jetedi.