Petropavlda sıntetıkalyq esirtki jasaý laboratorııasy áshkerelendi. Onyń ıesi 20 jastaǵy turǵyn bolyp shyqty. Biraq onyń artynda hımııalyq biliktiligi joǵary bir adamdardyń turýy múmkin. Tergeý-tekserý barysynda olar anyqtalar degen úmit bar.
Áıtpese ne hımııalyq, ne bıologııalyq bilimi joq jas jigit sıntetıkalyq esirtkini jasaý joldaryn qaıdan bilýi múmkin. Ustalǵan kezde onyń laboratorııasynan ósimdik tektes zat salynǵan 8 polımer túıinshek tabylǵan. Al Haltýrın kóshesindegi úıinen 52 túıinshek pen suıyqtyq quıylǵan eki ydys shyqty. Saraptama onyń jasaǵany «spaıs» degen atpen belgili sıntetıkalyq esirtki ekenin anyqtady. Sondaı-aq ony daıyndaýǵa arnalǵan prekýrsorlar ekendigin kórsetti. Kúdiktiniń aıtýynsha, esirtkini ol jeke paıdalaný úshin saqtaǵan. Bul árıne jalǵan ekeni kórinip tur. Arnaıy laboratorııanyń «ónimin» qanshama adam tutynyp, qanshamasy densaýlyǵyn qurtqany, qanshamasy qylmystyq áreketterge barǵany daýsyz.
Tárkilengen esirtkiniń jalpy sany 200 bir rettik dozaǵa jýyq, jalpy salmaǵy – shamamen 8 gramm. Bul asa iri mólsherge jatady. Sonymen qatar tintý barysynda onyń úıinen respıratorlar, grammdyq tarazylar, ólsheýish kolbalar men sıntetıkalyq esirtkini daıyndaýǵa arnalǵan basqa da qurylǵy tárkilendi.
«Qazirgi ýaqytta kúdikti qamaýǵa alyndy. Qylmystyq kodekstiń 297-baby 3-bóligi «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa deıingi tergep-tekserý júrgizilýde. Baptyń sanksııasy 15 jylǵa deıingi merzimge bas bostandyǵynan aıyrý túrindegi jazasyn kózdeıdi», deıdi PD Esirtki qylmysyna qarsy is-qımyl basqarmasynyń bastyǵy, polısııa polkovnıgi Jandos Basybaev.
PETROPAVL