Indýstrııa jáne ınfraqurylymdyq damý mınıstrliginiń «Ashyq saǵat alańynda» elimizdegi avtokólik joldarynyń qysqy maýsymǵa daıyndyǵyna arnalǵan jıyn ótti, dep habarlaıdy Egemen.kz vedomstvonyń baspasóz qyzmetine silteme jasap.
ZOOM platformasynda uıymdastyrylǵan basqosýǵa Avtomobıl joldary komıtetiniń tóraǵasy Tólegen Abdýllın, «QazAvtoJol» UK» AQ, «Qazaqavtojol» JShS basshylary, táýelsiz sarapshylar men júk jáne jolaýshylar tasymaldaýshy kompanııalardyń ókilderi qatysty.
«Qazaqavtojol» JShS aqparatyna súıener bolsaq, arnaıy tehnıkalardyń qysqy kezeńge daıyndyǵy 74 paıyzdy quraıdy. Kompanııa basshysy Samat Ǵılymovtyń aıtýynsha, aldaǵy maýsymdyq jumystar úshin jeke tulǵalardan 400 dana tehnıkany jalǵa alý qajettiligi týyndap otyr.
«Qazirgi tańda bizge 2 836 dana tehnıka qajet. Al qolymyzda bar-joǵy 1 117 birlik tehnıka bar. Onyń 527-siniń tozyǵy jetken. Jóndeýge de kelmeıdi», dep atap ótti Samat Ǵılymov.
Sondaı-aq ol eńbekaqy mólsheri 30 paıyzǵa artqanymen bilikti mamandarǵa degen tapshylyq sezilip otyrǵanyn aıtty.
«Mınıstrlik tarapynan qoldaýdyń arqasynda mekeme jumysshylarynyń jalaqysy kóterildi. Búginde qyzmetkerler jetispeýshiligi birtindep azaıyp keledi. Dese de joǵary bilikti mamandarǵa degen zárýlik týyndaýy múmkin ekendigin joqqa shyǵarmaımyz», dedi «Qazaqavtojol» basshysy.