Veterınarlyq sektor jalaqynyń tómen bolýyna baılanysty jas jáne joǵary bilikti kadrlardyń jetispeýshiligin sezinýde. Bul týraly brıfıngte Aýyl sharýashylyǵy vıse-mınıstri Rústem Qurmanov málim etti, dep habarlaıdy Egemen.kz.
«Agrarlyq sektordaǵy jalaqysy tómen mamandyqtardyń biri – veterınarlyq dárigerler ekeni anyqtaldy. Sonymen qatar eldegi veterınarlardyń ortasha jasy 40-50 jasty quraıdy. Biz sektordyń jas jáne joǵary bilikti kadrlar jetispeıtinin baıqadyq. Buǵan eńbek jaǵdaılarynyń qıyndyǵy, jalaqynyń tómendigi, aýyldyq jerlerde ınfraqurylymnyń damymaýy yqpal etedi. Munyń bári veterınar mamandyǵynyń jastar úshin tartymsyz bolýyna ákeledi», dedi QR Aýyl sharýashylyǵy vıse-mınıstri Rústem Qurmanov.
Onyń aıtýynsha, 2022 jyldyń birinshi toqsanynan bastap elimiz boıynsha veterınarlyq mamandardyń jalaqysy ortasha eseppen 33,4%-ǵa ósti, al 2022 jyldyń sońyna deıin ony taǵy 60%-ǵa ulǵaıtý josparlanyp otyr.
Onyń aıtýynsha, ortasha aılyq jalaqy Qyzylorda oblysynda 98 myń teńgeden Pavlodar oblysynda 206 myńǵa deıin ózgeredi.
«Bul jetkiliksiz. Máselelerdi sheshý úshin biz básekeles sektor joq okrýgterde kórsetiletin qyzmetterdiń aqyly kólemin ulǵaıtý boıynsha jumys júrgizemiz. Kelesi jyldan bastap kommýnaldyq veterınarııalyq kásiporyndardyń veterınarııalyq mamandarynyń aılyqaqysyna 50%-dyq jáne memlekettik, kommýnaldyq mekemelerdiń laýazymdyq jalaqylaryna 140%-dyq qosymsha aqy tóleýdi júzege asyrý kózdeledi. Qosymsha aqylar zııandy eńbek jaǵdaılary, 1-2 patogendi bıoagenttermen jumys istegeni úshin tólenedi», dep naqtylady R.Qurmanov.
Sondaı-aq vıse-mınıstr veterınarlyq dárigerdiń júktemesin teńestirý úshin Agrarlyq ýnıversıtetpen birlesip bir veterınarlyq dárigerge normatıvtik júktemeniń esebi júrgizilip jatqanyn aıtty.
Budan soń ol kelesi jyldan bastap veterınarlyq dárigerlerdi saýyqtyrýǵa arnalǵan járdemaqy retinde eki laýazymdyq jalaqy bólý qarastyrylǵanyn
/aıtty.