Eýrazııalyq damý banki 6 qatysýshy-memleketke qatysty kezekti makroekonomıkalyq sholýyn jarııalady. Onda elderdiń damý baǵytyna qysqa merzimdi perspektıva aıasynda baǵa berilgen.
Sholýda óńirdegi ekonomıkalyq damýdyń kóp qyrly baǵytyn atap ótedi. Jarty jyldyń qorytyndysy boıynsha Reseı men Belorýssııada quldyraý (0,5 paıyz jáne 4,2 paıyz) baıqalady. Al ózge qatysýshy-elderdegi ishki jalpy ónim senimdi túrde joǵarylaǵan. Atap aıtsaq, Armenııada – 11,8, Qazaqstanda – 3,4, Qyrǵyzstanda – 6,3, Tájikstanda – 7,4 paıyz.
EADB analıtıkteriniń pikirine qaraǵanda, 2022 jyldyń qorytyndysy boıynsha ekonomıkalyq kórsetkishter birqatar elde boljamnan da jaqsyraq bolyp shyǵady.
«Buǵan, atap aıtqanda, engizilgen shekteýlerge beıimdelýdiń aıtarlyqtaı joǵary qarqyny jáne munaı óndirýdegi sanksııalardyń keshiktirilgen sıpaty yqpal etedi. О́ńirdiń ekonomıkasyn qoldaýǵa bılik sharalary da áserin tıgizip jatyr. Degenmen ekinshi jartyjyldyqtaǵy ekonomıkalyq dınamıkaǵa syrtqy konıýnktýranyń nasharlaýy aıtarlyqtaı áser etýi múmkin. Eýroaımaq pen AQSh-ta resessııa yqtımaldyǵy joǵary. Ol resessııa tym tereń bolmaıdy dep kútiledi. Degenmen bul jaǵdaı aımaq elderiniń eksporttyq taýarlaryna álemdik ekonomıkadaǵy suranysqa keri áserin tıgizedi», deıdi sarapshylar.
Bank sholýynda maýsym men shildede rýbldiń aıtarlyqtaı nyǵaıýy bolǵanyn, biraq sol nyǵaıýdyń artta qalǵanyn málimdeıdi. Aldyńǵy makroekonomıkalyq sholýda EADB sarapshylary rýbldiń mundaı nyǵaıýy Reseı ekonomıkasy úshin jaǵymsyz faktorǵa aınalýy múmkin ekenin kórsetetin esepteýlerge silteme jasaǵan.
Sarapshylardyń aıtýynsha, rýbl ekinshi jartyjyldyqta bıýdjet pen eksporttaýshylar úshin qolaıly deńgeıge kóshedi. Bul qozǵalystyń qarqyndylyǵy eń aldymen ımportqa suranystyń qalpyna kelýine baılanysty bolmaq.
Qazir Qazaqstannyń aıyrbastaý beketterinde 1 rýbl 7,9 teńgeden saýdalanyp jatyr.