ASTANA. 9 mamyr. Pavlodar oblysynda polıseıdi qaǵyp ketken eks-sheneýnik Janat Smataev qamaýda qaldyryldy. Bul týraly oblystyq sot baspasóz qyzmetine silteme jasaǵan Tengrinews.kz tilshisi habarlady.
Habarlamada aıtylǵandaı, ustalǵan eks-sheneýniktiń qorǵaýshysy qamaýǵa alý týraly sot sheshimine qatysty shaǵymdanyp, Janat Smataevty kepilge berýdi suraǵan.
Biraq baspasóz qyzmeti «Smataev aýyr qylmys boıynsha jaýapqa tartylyp otyr. «Ol quqyq qorǵaý qyzmetkeriniń densaýlyǵyna zııan keltirip, ómirine qaýip tóndirdi. Oqıǵa ornynan qashyp ketti» degen bappen jaýapkershilikke tartylǵan. Sondyqtan sot onyń qorǵaýshysynyń shaǵymyn qanaǵattandyrmady», - degendi aıtty.
Eske sala keteıik, ústymyzdegi jyldyń sáýir aıynda Pavlodar oblysy Ertis aýdany apparatynyń basshysy 29 jastaǵy Janat Smataev «Mersedes» kóligin ishimdik ishken kúıinde júrgizip kele jatqan. Ol ózin toqtatqan polısııa qyzmetkerin qaǵyp, oqıǵa ornynan qashyp ketken. Jábirlenýshini tastap qashqan ol artynsha ustalyp, qamaýǵa alynǵan bolatyn.
Budan soń Janat Smataevqa «Quqyq qorǵaý organy qyzmetkeriniń ómirine qaýip tóndirdi» degen aıyp taǵylyp, sot sanksııasy boıynsha eki aıǵa qamaýǵa alynǵan.
Keıbir derekterde Smataev jol-kólik oqıǵasy bolardan birneshe kún buryn Ertis aýdandyq apparatynyń basshylyǵynan bosatylǵany málimdelgen.
Degenmen, ákimshiliktiń resmı saıtynda oqıǵa bolǵannan keıin de onyń «basshylyq qyzmet atqaratyny» birneshe kún boıy kórsetilip turǵan.
Qurysh Nurymbet.
Derekkóz: Tengrinews.kz.
Foto: egemen.kz.