Ústel tennısinen zor úmitimizge balaǵan Alan Qurmanǵalıev bizdi taǵy da tolaıym tabysymen qýantty. Jas sportshy Shvesııanyń Helsıngborg qalasynda ótken WTT Youth Contender halyqaralyq týrnırinde 15 jasqa deıingi tennısshiler arasynda chempıon atandy.
Alan Qurmanǵalıev osynyń aldynda Majarstan men Týnıste eresekter arasynda ótken jarystarda sátsiz óner kórsetken bolatyn. Qazaqstan qurama komandasynyń bas jattyqtyrýshysy jáne chempıonnyń jeke bapkeri Elmıra Álıeva jas sportshynyń osy jeńilisten laıyqty qorytyndy shyǵara bilgenin aıtady.
– Alan U-17 sanatyndaǵy segizdikke kirý jolynda Úndistannan kelgen myqty qarsylasyna ese jiberip aldy. Biz osy oıynǵa muqııat taldaý jasadyq ta, qateliktermen jumys istedik. Sol sebepti, Alan koreı sportshysymen bolǵan fınaldyq jekpe-jekke saqadaı-saı daıyndyqpen shyqty, – dedi E.Álıeva.
Helsıngborgtegi týrnırde qaraǵandylyq tennısshi áýeli danııalyq Iаnýs Bedstedti 3:0 esebimen tize búktirdi. Odan keıin úndistandyq Balamýrýgan Radjasekaran men nemis Frıdrıh Kýn Fon Býrgsdorfty 3:1 esepterimen jáne shved Pıter Alestedtti 3:0 esebimen jarys jolynan shyǵardy. Jartylaı fınalda ol koreıalyq qarsylasy Lı Synsýdy 3:0 esebimen betqaratpaı jeńdi. Al fınalda bolǵan asa tartysty ótken matchta ońtústikkoreıalyq taǵy bir tennısshi Kvon Hekten basym túsip, týrnırdiń chempıony atandy.
Eske salar bolsaq, bul – Alan Qurmanǵalıev syndy talantty tennısshiniń halyqaralyq týrnırlerde jeńip alǵan 15-shi medali.
Qaraǵandy oblysy