City Mall saýda ortalyǵynyń kólik turaǵyna kirgeli jatqan edim, eki jas bala qolyn bulǵap, «myna orynǵa toqtańyz» deıdi. Álginde túsine qoımadym. Janyma jaqyndap kelip, jany qalmaı amandasty da, «Áınegińizdi jýyp bereıik» dedi. Olar sharýalaryna kiristi. Biz de áńgimege tarttyq…
Kúndelikti jumystary eken. Qımyldary shıraq. Sózge de aǵyp tur. Kámeletke tolmaǵan balanyń jumysqa tartylýy zańǵa qaıshy, árıne. Áńgimeni osydan bastaǵanbyz. Qos balaqaı munyń bárin biledi. «Polıseıge» aıtpasam, ashyq áńgimelesetinderin jetkizdi.
– Buǵan deıin ustalyp kórip pe edińder?
– Joq. Kóre qalsaq, qashyp ketemiz. Bir dosymyzdy ustap, úsh kún qamap tastaǵan. Ata-anasynan sóz estidi de, shyqpaı ketti…
Dál osy tusta turaq janyndaǵy joldan jol polsııasy qyzmetkerleriniń kóligi ótip bara jatty. Ekeýi jaltaq-jaltaq etedi. Bizge qaraı baǵyt alsa, qos balaqaı qolyndaǵy áınek súrtip júrgen jaraqtaryn tastaı sala, qasha jónelgeli tur.
Jaqyn tanysa tústik. Esimderin aıtty. Noıannyń jasy –15-te, Sergeıdiki – 13-te (esimderi shartty túrde ózgertildi). Ekeýi bir mektepte oqıdy. Bir kósheniń turǵyny. Munda kelip, tıyn-teben taýyp júrgenderine aıǵa jýyqtapty.
– Al ata-analaryń bile me bul sharýalaryńdy? Qarsy emes pe?
– Iá, biledi. Tek, baıqap júrińder dep eskertip otyrady.
– Aqshalaryńdy qaıda jaratasyńdar?
– Úı ishine beremiz. Azyq-túlikke jumsaıdy. О́zimizge de shamaly aqsha alyp qalamyz.
Kúndelikti qansha tabatyndaryn bilgimiz kelip, suradyq. «Árqalaı tabamyz. Mysaly, meniń eń kóp tapqanym – 9 myń teńge. Bir aǵataı 5 myń teńge berip ketti. «Jaraısyń! Talaptanyp júr ekensiń» dep. Ol kisige deıin 4 myń teńge aqsham bar edi. Sony qanaǵat ettim de, qaıttym úıime» deıdi Noıan batyr. «Aqsha bermeı ketetinder bola ma?» dep te surap qaldyq. «Aqsha bermeı ketken kisi bolmapty. Tek, bir aǵataı 1 teńge bergen bolatyn. Sonda da alǵysymdy aıttym. Biz úshin ol da aqsha ǵoı» dep qaıyrdy jaýabyn. Álgi kisiniń onysyna yza, Noıannyń bul sózine ishteı yrza boldyq. Al Noıannyń serigi Sergeı eń kóbi 6 myń teńgeni oljalapty. «Taza tappadyq» degen kúnniń ózinde eń kemi 2 myń teńgemen qaıtady eken.
– Tek, osy jerde ǵana júresińder me, álde?
– Ortalyq ámbebap dúkeni men «Qazaqstan» bıznes ortalyǵynyń kólik turaǵynda da júremiz.
«Úsh núktemiz bar» deıdi. Kádimgi kásip qylyp alypty. Basynda kólikti turaqqa qoıýǵa kómektesken eken. Keıinnen ony ońaı jolmen keletin aqsha dep oılaǵandaryn aıtady. «Tegin aqsha alǵanymyz bolmas, áınek tazalaıtyn jabdyq alaıyq ta, tereze jýyp, eńbekteneıik» dep ýaǵdalasypty ekeýi. Arlanbaı aqsha taýyp júrgen eki qulynshaqtyń aldymen adal eńbekti oılaǵandary tolǵandyryp tastady.
«Bolar bala jasynan». Eńbekke erte qulshynǵan ekeýiniń armanyn da bildik. Noıan dánekerleýshi bolǵysy kelse, Sergeı bıznespen aınalysqandy jón kóredi.
– Jýrnalıst aǵataı, biz jaıly kúshtilep jazyńyzshy, – deıdi shat-shadyman keıipte.
P.S. Iá, bizdiń maqsatymyz aradaǵy áńgimeni qaz qalpynda jetkizý. Ras, balalardyń bul eńbegine edireıe qaraıtyndar da bar. «Áke-sheshesi ne qarap otyr?» dep. Dál osy jastaǵy qala balalary esirtki tasymaldap júr emes pe? Oǵan qaraǵanda bul eki qulynshaqtan aınalyp ketý kerek sekildi. Siz qalaı oılaısyz?
Qasymhan ǴALYM,
jýrnalıst
Qaraǵandy