Besqaraǵaıda mektep oqýshylary balabaqshada oqyp júr. 2000 jyldardyń basynda aýdan ortalyǵyndaǵy Q.Rysqulbekov atyndaǵy orta mektepte oqıtyn balalardyń sany kúrt kóbeıgendikten amalsyzdan oqýshylardyń jartysyn aýyldaǵy balabaqshaǵa kóshirýge týra kelgen. Arada 20 jyldan artyq ýaqyt ótse de qaraǵaıly óńirdiń halqy jańa bilim berý ǵımaratyna jarymaı keledi.
100 balaǵa kabınet jetispeıdi
Boras orta mektep-baqshasynyń qalyptasý tarıhy qysqasha alǵanda osylaı. Aýdandyq bilim bóliminiń basshysy Samat Omarǵazınniń aıtýynsha, qazir munda birinshi qabatta 135 bala 6 topqa bólinip, mektepke deıingi bilimmen qamtylyp keledi. Ekinshi qabatynda 400-ge jýyq oqýshy eki aýysymda bilim alyp júr.
«Aldaǵy oqý jylyna 404 bala kelip, eki aýysymda oqıdy dep kútilip otyr. Munda sabaq oqýǵa arnalǵan 11 kabınet qana bar. Demek 100 balaǵa kabınet jetispeıtinin baıqaýǵa bolady. Shyǵys Qazaqstan oblysynyń qaramaǵynda bolǵan kezimizde óńir basshysynan osy máseleni sheship berýdi suraǵanbyz. Osy mektep 2023 jyldyń tizimine kirgizilgen bolatyn. Danıal Ahmetov óńirge kelgen kezde bıyl jobalyq-smetalyq qujaty daıyn bolady dep aıtqan edi. Alaıda jańa oblys qurylǵan soń, bul prosedýradan qaıta ótýimizge týra keledi. Sondyqtan Abaı oblysynyń ákimi Nurlan Uranhaev bul máseleniń sheshilýine septesedi degen úmittemiz. Nege deseńiz, bul – birinshi kezekte balabaqsha. Orta bilim berýdiń talaptaryna sáıkes kelmeıdi. Ekinshiden, bul ǵımaratqa kúrdeli jóndeý júrgizý qajet. Uzaq jyldan beri mektep-baqshany jóndeýge qarajat bólinbeı keledi», dedi S.Omarǵazın.
Jańa balabaqsha qırap jatyr
Aýdan ortalyǵyndaǵy «Aınalaıyn» balabaqshasynyń ashylǵanyna 8 jyl ǵana bolǵan. Áıtse de «Aınalaıyndy» aınalyp ótseńiz onyń qabyrǵalarynyń jaryqshaqtan kórinbeıtinin baıqaýǵa bolady. Apatty dep tanylǵan balabaqsha 2014 jyly shamamen 225 mln teńgege salynǵan-dy. Munda 90 bala 4 topqa bólinip, mektepke deıingi bilimmen qamtylýǵa tıis edi. Dese de kóktem saıyn aýdan halqyn mazalaıtyn jerasty sýlary saldarynan bilim berý ǵımaraty búline bastaǵan.
«Jerasty sýlary kóterilip, ókinishke qaraı, balabaqshanyń edeni búlinip ketti. Osyǵan baılanysty «Altaı Sáýlet» kompanııasy tıisti saraptamany jasap berdi. Jobalyq-smetalyq qujat daıyndalyp, jóndeý jumystaryna shamamen 72 mln teńge bólinýge tıis bolatyn. Byltyr oblys ortalyǵynda qurylysqa qajetti qarajatty qorǵap shyqqan edik. Bıyl kóktemde jóndeý jumystary bastalýy kerek edi. Biraq jańa ákimshilik aýmaqqa bólingendikten bul qarajatty Shyǵys Qazaqstan oblysynyń ákimdigi ózderinde qaldyrdy. Bul jaǵdaıdyń saldarynan 90 bala úılerinde otyrýǵa májbúr», dedi aýdandyq bilim bóliminiń basshysy.
Bashkólde 10-11 synyp jabyla ma?
Budan basqa besqaraǵaılyqtar Bashkóldegi orta mektepte 10-11 synyptyń jabylatynyna alańdaýly. Ata-analar bul týraly oqý jylyna jarty aı qalǵanda ǵana habarlandyrylǵanyna narazy. Abaı oblysy bilim basqarmasynyń basshysy Nurjan Ahmetqalıev aıtqandaı, bul máseleni retteýdiń joldary bar.
«Qazir bilim bóliminiń ókilderi oqýshylardy mektep-ınternatqa ornalastyrýdy usyndy. Mektep shaǵyn bolǵandyqtan, 10-11 synyptardy jabý týraly sheshim qabyldandy. Oqý-aǵartý mınıstrliginiń talabyna sáıkes oqýshylardyń kontıngenti 81%-dan tómen bolmaýy qajet. Al atalǵan mektepte onyń kórsetkishi – 65%. Aýdanda tekserý komıssııasy bolyp, osyndaı uıǵarymǵa kelgen», dedi N.Ahmetqalıev.
Desek te bul usynysty barlyq ata-ana jyly qabyldady dep aıtý qıyn. Sol sebepti oqýshylardy aýdanda qyzmet etip turǵan negizgi mektepterge tasymaldaý múmkindikteri de pysyqtalyp jatyr.
Balabaqshanyń ǵımaraty qaıtarylady
Aýdandaǵy bilim berý salasyndaǵy ahýalmen tanysqan oblys ákimi Nurlan Uranhaev barlyq ózekti máseleni júıeli túrde sheshýge kúsh salynatynyn jetkizdi.
«Jylandy aýylynda offteık kelisimsharty negizinde mektep salynyp jatyr. Bıyl tapsyrylady dep kózdelip otyr. Besqaraǵaıdaǵy mektep-baqshanyń qyzmetimen tanysyp shyqtym. Sondaı-aq apatty balabaqshanyń jaǵdaıyna qanyqtyq. Qazir kúrdeli jóndeý jumystaryna jobalyq-smetalyq qujaty daıyndalyp jatyr. Bul bıyl jóndeletin bolady. Josparda 300 oryndyq mekteptiń qurylysy tur. Ony 600 orynǵa aýystyramyz. Sóıtip balabaqshada qańtarylyp otyrǵan oqýshylar talapqa sáıkes mektepte bilim alady. Al balabaqshanyń ǵımaraty ózderine qalady», dedi N.Uranhaev.
Bıyl aýdan boıynsha 1-synyptyń tabaldyryǵyn 264 bala attaıdy dep josparlanyp otyr. Tutastaı alǵanda, bıylǵy oqý jylyndaǵy oqýshylardyń sany 3 myńǵa jetýge tıis.
Abaı oblysy,
Besqaraǵaı aýdany