Jylyoı aýdanynda turatyn Almıra esimdi 9 jasar qyz mektepten kele jatyp buralqy ıtten qashqan. Sol kezde jol jıegine qulap, bir tizesin bordıýrge soǵyp alǵan. Oqıǵa bıylǵy 31 qańtarda bolǵan.
Oblystyq balalar aýrýhanasynyń travmatolog-dárigeri Jaqsylyq Maǵzomovtyń aıtýynsha, sodan beri birneshe ret emdelý kýrsynan ótken. Aldymen Jylyoı aýdandyq ortalyq aýrýhanasyna qaralǵan. Keıin 2 aqpanda oblystyq balalar aýrýhanasynda onyń jambas súıegine eki ota jasaldy. Al 8 shildede jambas súıeginen ımplanttalǵan fıksatorlardy alyp tastaý otasy sátti ótti.
Budan soń ambýlatorlyq baqylaýǵa alynyp, ońaltý ortalyǵynda emdeldi. Bir aı buryn oblystyq balalar aýrýhanasynyń bazasynda ornalasqan «Qamqorlyq» ońaltý ortalyǵyna jatqyzyldy. Atalǵan ortalyqta ońaltýdan sátti ótken Almıra qaıtadan qalypty júrýge múmkindik aldy. Osyǵan oraı ońaltý ortalyǵynda oblystyq balalar aýrýhanasynyń jas mamany, travmatolog-dáriger Jaqsylyq Maǵzomov 9 jasar qyzdyń tusaýyn qaıtadan kesti.
Qazir Almıra otbasyna oraldy.
Atyraý oblysy