Abaı oblysynyń polısııa departamenti Esirtki qylmysyna qarsy is-qımyl basqarmasynyń qyzmetkerleri psıhotroptyq zattardy zańsyz satty degen kúdikpen jergilikti kolledjderdiń 18 jastaǵy úsh stýdentin ustady, dep habarlaıdy Egemen.kz.
Kúdiktiler Telegram arnalar jáne ınternet saıttar arqyly psıhotroptyq zattarǵa tapsyrys alyp Semeı qalasynyń aýmaǵynda taratyp kelgen.
«Tintý sharalaryn júrgizý kezinde «satýshylardan» polıetılenge oralǵan 34 dana esirtki túıinshekteri tárkilendi. Salmaǵy 13 gramm bolatyn aq untaq Alfa-PVP sıntetıkalyq esirtkisi bolyp shyqty», delingen IIM baspasóz qyzmetiniń habarlamasynda.
Polıseılerdiń málimdeýinshe, asa iri kólemde esirtki ótkizý faktisi boıynsha Qazaqstan Respýblıkasy Qylmystyq kodeksiniń 297-babyna sáıkes sotqa deıingi tergeý júrip jatyr.
«Aıyptalýshylar Semeı qalasy Polısııa basqarmasynyń ýaqytsha ustaý ızolıatoryna qamaldy. Kúdiktiler 15 jylǵa deıin bas bostandyǵynan aıyrylýy yqtımal», dedi baspasóz qyzmeti.