Sport kúni qarsanynda Jetisýda jańa stadıon ashyldy. Sarqan qalasyndaǵy N.Ostrovskıı mektep-lıseıinde ornalasqan oıyn alańy shaǵyn shahardyń sánin keltirip tur. Onyń qurylysyna jergilikti bıýdjetten 35 mln teńge bólingen.
Buǵan deıin oqýshylar tozyǵy jetken kóne alańda jattyǵyp kelgen edi. Qazir iske qosylǵan jańa sport alańynyń jalpy kólemi 1 800 sharshy metr, onda jasandy gazon jabyndysy tóselgen fýtbol alańy, arnaıy júgirýge arnalǵan rezeńke jolaqty jol, basketbol jáne voleıbol alańdary bar. Stadıon qurylysyn «Millennium Story Group» JShS qurylysshylary júrgizgen. Qurylys jumystary bıylǵy maýsym aıynda bastalǵan bolatyn.
Sarqan aýdanynyń ákimi Talǵat Qaınarbekovtiń aıtýynsha, bıylǵy Balalar jyly aıasynda Sarqan qalasymen qatar, shalǵaı jatqan Qarabóget, Kókózek, Almaly, Qarǵaly aýyldarynda zaman talabyna saı eki shaǵyn, eki úlken – jalpy 4 fýtbol stadıony, 5 strıt-vorkaýt jáne 8 balalar alańy salynyp, jyl sońyna deıin qoldanysqa beriledi.
Buǵan deıin maýsym aıynyń sońynda Sarqan qalasynda jeke kásipker óz qarajatyna 300 adamdyq «Jetisý» basseın ortalyǵyn ashqan bolatyn. Munda kelýshilerdiń jas ereksheligine qaraı úsh basseın tıisti qajettiliktermen jabdyqtalǵan.
Jalpy, Sport kúnine arnalǵan sharalardyń aıasynda Sarqandaǵy «Jastar» saıabaǵynda aýyl sharýashylyǵy ónimderiniń jármeńkesi ótkizilip, kelýshilerge naryqtaǵydan tómen baǵada 3 tonna kókónis, 850 kılodan astam et, 300 lıtr sút pen sút ónimderi jáne basqa da azyq-túlikter saýdalandy.