Bolgarııanyń bas shahary – Sofııada erkin jáne áıelder kúresinen jastar arasyndaǵy (U-20) álem chempıonaty aıaqtaldy. Bul jarysty jigitterimiz bir ǵana júldemen qorytyndylaǵanyn biz buǵan deıin baıandaǵan edik. 57 kılo salmaq dárejesinde synǵa túsken Mereı Bazarbaev kúmis medaldi moınyna ildi. Ol grekııalyq Andreas Parotsıdıs, úndistandyq Abhıshek Dhakany jáne ýkraınalyq Georgıı Kazanjıdi qapy qaldyrǵanymen, fınalda amerıkalyq Iore Rassell Volktan bir ǵana upaı aıyrmashylyǵymen utyldy.
Kúrestiń bul túrinde Iran quramasynyń qarqynyna eshkim shydaı almady. Parsy eliniń úsh birdeı pehlevany jeńis tuǵyrynyń eń bıik satysyna kóterildi. Solardyń arasynan Ámirhosseın Bıglar Fıroýzpoýrbandpeıdi erekshe atap ótýge bolady. 92 kılo salmaqta kúresken ol tórt kezdesýdiń barlyǵyn qosa alǵanda 41:0 esebimen aıaqtady. Barlyǵynda da taza jeńis. Bul jarysty ırandyqtar 3 altyn, 1 kúmis jáne 4 qolamen qorytyndylady. Ekinshi orynda – AQSh. Amerıkalyqtar 2 altyn, 2 kúmis jáne 1 qolany ıelendi. Úzdik úshtikti Ázerbaıjan túıindedi. Qap taýynyń qyrandary 2 altyn men
1 kúmisti enshiledi. Sofııa kóginde Japonııa (1+1+0), Fransııa (1+0+2) jáne О́zbekstannyń da (1+0+1) ánurany shyrqaldy. Sondaı-aq Úndistannyń da sportshylary tolaǵaı tabysqa qol jetkizgenin aıta ketýge tıispiz. Bolgarııanyń astanasynda olar jeti júlde aldy.
Erkin kúresten álem chempıony atanǵan balýandar: 57 kılo – Iore Rassell Volk (AQSh), 61 kılo – Iýto Nıshýıshı (Japonııa), 65 kılo – Ýmıdjon Jalolov (О́zbekstan), 70 kılo – Kanan Heıbatov (Ázerbaıjan), 74 kılo – Jabraıyl Gadjıev (Ázerbaıjan), 79 kılo – Sobhan Hooshan Iаarı (Iran), 86 kılo – Rahım Magomedov (Fransııa), 92 kılo – Amırhosseın Bıglar Fıroýzpoýrbandpeı (Iran), 97 kılo – Benjamın Allen Kýeter (AQSh) jáne 125 kılo – Amırreza Masoýmı Valadı (Iran).
Áıelder kúresinen ótken jarystyń alǵashqy kúni Madına Aman óz jankúıerlerin qýantty. 59 kılo salmaqta baq synaǵan ol bastapqy básekelerde basymdyq tanytyp, jartylaı fınalda majarstandyq Vıktorııa Borshoshqa ese jiberdi. Bul básekeniń de taǵdyryn bir ǵana upaı sheshti. Odan keıin polshalyq Aleksandra Veronıka Vıtosty san soqtyrǵan qazaq qyzy qola medal ıelendi.
Kelesi kúni 53 kılo salmaqta beldesken Altyn Shaǵaevanyń asqan sheberligine tánti boldyq. Qazaqtyń qarshyǵadaı qyzy bolgarııalyq Nazıfa Mustafa Taır, amerıkalyq Ketı Braıan Gomes jáne mysyrlyq Shaıma Barakat Muhammedtiń tas-talqanyn shyǵardy. Bul básekelerdiń úsheýinde de Shaǵaeva aıqyn basymdyq tanytty. Fınalda Azııa chempıony, úndistandyq Antım Antımge ese jibergen Altyn kúmispen kúpteldi. 72 kılo salmaqtaǵy Anastasııa Panasovıch te dál sol mejeden kórindi. Shırek fınalda bolgarııalyq Vanessa Stoıanova-Georgıevany súrindirgen ol jartylaı fınalda japonııalyq Sýmıre Nıkrany jolynan yǵystyrdy. Aqtyq synda amerıkalyq Amıt Eılormen kúsh synasty. Bul tartysta AQSh sportshysynyń mysy basym boldy. Jartylaı fınalda japonııalyq Rıýka Natamıdi jeńe almaǵan 57 kılodaǵy Zeınep Baıanova qola medal úshin talasty. Alaıda ýkraınalyq Oleksandra Komoneske onyń áli jetpedi.
Bolgarııadaǵy básekeni Qazaqstannyń burymdylary 2 kúmis jáne 1 qola medalmen qorytyndylap, jalpy esepte tórtinshi orynǵa taban tiredi. Atalǵan jarys Japonııa quramasynyń aıqyn jeńisimen aıaqtaldy. Kúnshyǵys eliniń sulýlary 8 altyn jáne 2 qolany oljalady. Iаǵnı osy birinshilikke qatysqan 10 sportshynyń barlyǵy da oljaǵa keneldi. Úndistan 1 altyn, 3 kúmis jáne 3 qolany ıemdense, AQSh 1 altyn, 2 kúmis jáne 3 qolany qorjynǵa saldy.
Áıelder kúresinen álem chempıony atanǵan balýandar: 50 kılo – Ýmı Ito (Japonııa), 53 kılo – Antım Antım (Úndistan), 55 kılo – Moe Kııýooka (Japonııa), 57 kılo – Rıýka Natamı (Japonııa), 59 kılo – Sakýra Motokı (Japonııa) , 62 kılo – Nonoka Ozakı (Japonııa), 65 kılo – Mahıro Ioshıtake (Japonııa) , 68 kılo – Amı Ishıı (Japonııa), 72 kılo – Amıt Elor (AQSh) jáne 76 kılo – Aıano Moro (Japonııa).
Senbide grek-rım kúresinen básekeler bastaldy. Bir ókinishtisi, Armenııanyń ókilderine qarsy kelgende bizdiń balýandardyń barlyǵy da bilgenderinen jańyldy. Máselen, shırek fınalda Iskhar Qurbaev (55 kılo) Karapet Manvelıannan oısyraı utyldy – 0:8. Dinıslam Saǵıtjan (63 kılo) Arman Vardanıanǵa ese jiberdi – 7:10. Al Omar Sataev (77 kılo) tusaýkeser kezdesýinde moldovalyq Aleksandr Gýtýge ese jiberdi – 5:13.
Alǵashqy jarys kúni eki otandasymyzdyń ǵana jeńis tuǵyryna kóterilýge múmkindikteri boldy. 130 kılo salmaqtaǵy Johar Uzarov alǵashqy aınalymda ırandyq Fardın Shaban Hedaıatıden (0:4) jeńilgenimen, qarsylasynyń fınalǵa shyqqanynyń arqasynda ol jubanysh beldesýine qatysty. Biraq bul mejede Johar armenııalyq Robert Vardanıannan (5:9) jeńilip, júldeli oryn úshin talasý múmkindiginen aıyryldy.
82 kılo salmaqtaǵy Maqsat Saılaý shvesııalyq Algot Kaellman (8:2), lıtvalyq Damıan Matvıenko (8:0) jáne estonııalyq Robın Ýspenskııdi (8:0) oısyrata utqanymen, jartylaı fınalda Armenııanyń taǵy bir apaıtósi Vıgen Nazarıanǵa (0:9) laıyqty qarsylyq kórsete almady. Desek te namysqa tyrysqan Maqsat sheshýshi tusta ýkraınalyq Mıkıta Alekseevten (3:0) aılasyn asyryp, qola medaldi moınynda jarqyratty.
Jeksenbide taǵy bes salmaq dárejesi boıynsha básekeler ótti. Bul básekelerde Qazaq eli namysyn Baqytjan Qabdyl (60 kılo), Dinmuhammed Qoshqar (67 kılo), Mereı Máýlethanov (72 kılo), Ázimhan Ábdiálıev (82 kılo) jáne Iýsýf Masıev (97 kılo) qorǵady. Bul jarystyń qorytyndysyn gazetimizdiń erteńgi sanynda jarııalaımyz.