Jetisý oblysynyń Muqyry aýylyna 30 shaqyrymdyq gaz qubyry tartylyp, tabıǵı gaz berildi. Bul – Kóksý aýdanynda osy jyly kógildir otynǵa qosylǵan besinshi aýyl. Muqyrylyq turǵyndar osyǵan deıin oblys ákimi Beıbit Isabaevpen kezdesýinde aýylǵa gaz qostyrýdy jyldyń sońyna deıin bitirip berýdi suraǵan edi. Mine, búgin tilegine jetip otyr.
Basshylyqtyń jiti baqylaýy men irkilissiz atqarylǵan jumystardyń nátıjesinde aýyl jurtynyń ótinish-talaby oryndalyp, 600 abonenttiń gazǵa qosylýyna múmkindik týdy. Jalpy aýdanda qazir 20 503 adamnyń nemese turǵyndardyń 43,7 paıyzynyń kógildir otynǵa qosylýyna jaǵdaı jasalǵan.
2020-2022 jyldarǵa Kóksý aýdanyndaǵy 8 eldi mekendi gazdandyrýǵa bıýdjetten 2,023 mlrd teńge bólingen bolatyn.
Osy kúnge deıin Muqyryny qosqanda 5 aýyl gazǵa qol jetkizse, jyl sońyna deıin 4 myńnan astam turǵyny bar taǵy úsheýi – Besqaınar, Jambyl, Mámbet aýyldary da gazǵa qosylady. Taǵy 12 aýyldy gazdandyrýǵa jobalyq-smetalyq qujattama ázirlenip jatyr. Olardyń qurylys-montaj jumystary 2023-2024 jyldary júrgiziledi.
«Gazǵa qosylý baǵasy 30 metrge deıin ortasha 145 myń tg, 1 tekshe metr gazdyń quny 30 teńge 33 tıyn jáne áleýmettik az qamtylǵan otbasylar tobyna jatatyndarǵa 30 paıyzǵa deıin jeńildikter qarastyrylǵan. Oǵan qosa qajetti pesh, dabyl qaqqysh jáne eseptegish (schetchık) alýǵa 10 aıǵa deıin esh paıyzsyz bólip tóleýge bolady. Aldaǵy qyrkúıek aıynyń 20-nan keıin Besqaınar, Jambyl, Mámbet aýyldary da gazǵa qosylady», deıdi Kóksý aýdanynyń ákimi Marlen Kólbaev.
Onyń aıtýynsha, gazǵa qosýdy BSP GROUP LTD, ST LTD, ST GAZ, «SK Mýslım», «Aıaks-78» jáne «Suńqar- 2002» JShS qamtamasyz etetin bolady.
Muqyryda alǵashqy bolyp úıine gaz tartylǵan turǵyn – 44 jyl jergilikti mektepte ustaz bolǵan, jalǵyz turatyn ardagerdiń biri, Eńbek Eri Nurmolda Aldabergenovtiń qyzy Rábıǵa Aldabergenova. Onyń qýanyshynda shek joq. Bul úıge «BSP grýpp» kompanııasy jergilikti ákimdikpen birlesip gazdy tegin qosyp bergen eken. Zeınetker gaz tartý isiniń basy-qasynda júrgen jandarǵa alǵysyn jaýdyrdy.
«Úıime tegin gaz qosyp bergen demeýshilerge, barsha azamatqa aıtar alǵysym sheksiz. Egde adam bolǵan soń júrektiń aýrýy, bel omyrtqamda syrqatym bar, sol úshin maǵan ot jaǵyp, kúl shyǵarǵan qıyn. Aýylǵa gaz kelgeni maǵan úlken demeý boldy. Qysta aıaz 40 gradýsqa barǵanda gazdyń qysymy tómendep ketetini zańdy qubylys. Ony ózim hımııa pániniń muǵalimi retinde jaqsy bilemin. Sondyqtan qatty aıazda qosymsha qor bolsyn dep 1-2 tonna kómir alyp qoıdym. Aýylǵa jetken tabıǵı gazdyń qyzyǵyn barsha turǵyn kóre alatynyna qýanyshtymyn», deıdi R.Aldabergenova.
Mine, endi kópten kútken Muqyry aýylyndaǵy 481 úı kómir jaǵýdan qutylyp, onyń ornyna gazǵa qosyla alady.
Jetisý oblysy