Hromtaý qalasyna jaqyn, 150 gektar aýmaqta 24 jel generatory parki boı kótermekshi. 155 megavatt elektr qýatyn óndiretin jasyl energetıka jobasyn iske asyrýshy – ERG kompanııasy.
2024 jyly qurylysy aıaqtalatyn osy jobaǵa kapsýla qalaý rásimi ótip, oǵan oblys ákimi Ońdasyn Orazalın, ERG Dırektorlar keńesiniń tóraǵasy Aleksandr Mashkevıch pen músheleri – Patoh Shodıev, Shýhrat Ibragımov qatysty. «Hromtaý» jel elektr stansasy jobasyna ERG kompanııasy 110 mlrd teńge kóleminde ınvestısııa saldy. Stansanyń qurylysy kezinde 300-ge tarta jumys orny ashylyp, ol iske qosylǵannan keıin 30 adam turaqty jumys isteıdi dep josparlanyp otyr.
«Qazaqstan Prezıdenti Qasym-Jomart Toqaev energııanyń balamaly, jańartylǵan kózderi arqyly elimizde jasyl ekonomıkanyń úlesin 80 paıyzǵa deıin jetkizýdi tapsyrdy. Osy tapsyrmany oryndaý aıasynda óńirimizde aýqymdy jumystar júrgizilýde. Hromtaý aýdanynda iske asyrylatyn qýatty jel elektr stansasynyń qurylysy – Aqtóbe oblysy úshin mańyzdy oqıǵa. О́ńirimizdiń áleýmettik-ekonomıkalyq damýyna yqpal etetin ERG, «Qazhrom» kompanııalarynyń qarqyndy damyp jatqanyn kórý qýanyshty», dedi oblys ákimi Ońdasyn Orazalın kapsýla qalaý saltanatynda.
Kapsýla qalaý rásiminen soń ERG Dırektorlar keńesiniń tóraǵasy Aleksandr Mashkevıch Hromtaýda sheteldik, otandyq jáne jergilikti BAQ ókilderimen baspasóz máslıhatyn ótkizdi. Onda halyqaralyq oqıǵalardyń kompanııa jumysyna áseri, temir keni eksporty jáne tasymaldaýda oryn alǵan qıynshylyqtar týraly aıtty. Álem energetıkalyq ótpeli kezeńge aıaq basqan kezde, ERG kompanııasy jasyl tehnologııaǵa kóshý jobasyn iske asyryp, osy salaǵa ınvestısııa salýǵa kóshkenin habarlady. Oǵan Prezıdent Qasym-Jomart Toqaevtyń Qazaqstannyń 2060 jylǵa deıin kómirtegi beıtaraptyǵyna qol jetkizý týraly tapsyrmasy sebep bolyp otyr. Aleksandr Mashkevıch Prezıdent tapsyrmasyn qoldaıtynyn, osy baǵytta transulttyq iri metallýrgııalyq kompanııa arnaıy baǵdarlama ázirlegenin habarlady. «ERG kompanııasy aldaǵy bes jylda Qazaqstan ekonomıkasyna 7 mlrd dollar ınvestısııa quıýdy josparlap otyr. Biz, mine, eń alǵashqy bolyp Hromtaýda 155 megavatt jel elektr stansasyna qarjy quıdyq», dedi.
Biz ERG kompanııasy Aqtóbe oblysyndaǵy kenniń «tarıhı qaldyqtarynan» tazartý jobasyn naqty qashan qolǵa alatynyn jáne Aqtóbe qalasyndaǵy ferroqorytpa zaýytynan aýaǵa shyǵarylatyn lastaýshy zattardy azaıtý jaıyn suradyq. ERG Dırektorlar keńesiniń tóraǵasy: «ERG kompanııasy 2030 jyldyń sońyna deıin Qazaqstannyń ekologııasyn saýyqtyrý sharalaryna 900 mlrd teńge jumsaýdy josparlap otyr. Bul kóptegen aýqymdy is-sharany qamtıdy. Sonyń ishinde Aqtóbe ferroqorytpa zaýytynda ferrogaz qaldyqtarynan elektr stansasyn qurýdy da josparǵa kirgizdik. Bul tamasha joba arqyly óndiris qaldyqtary gazynan 55 megavatt qýat óndirýge bolady. Aldaǵy bes jylda qazirgimen salystyrǵanda kásiporynnyń aýa lastaýshy shyǵaryndylaryn 50 paıyzǵa azaıtýdy josparlap otyrmyz», dedi.
ERG kompanııasy jasyl energetıkaǵa kóshý jobasyna daıyndyq jumystaryn bastap ketti. О́ıtkeni 2026 jyldyń 1 qańtarynan bastap Eýroodaq, Japonııa, AQSh memleketteri kómirsýtegine salyq engizbekshi. Jasyl tehnologııaǵa kóshý, saıyp kelgende, shıkizattyq kompanııalar úshin qymbatqa túsetin bolsa da, basqa jol joq. Sebebi tórt jyldan keıin «jasyl ónim» óndire almaıtyn, óndiris barysynda jasyl ónimdi qoldana almaıtyn kompanııalar halyqaralyq naryqqa kire almaıdy.
A.Mashkevıchtiń habarlaýynsha, ERG kompanııasy otandyq naryqta jumysyn bastaǵan kezden beri elimizdegi qaıyrymdylyq is-sharalaryna 1 mlrd dollar qarjy jumsaǵan. «Biz eshqashan da qaıyrymdylyqtan bas tartyp kórgen joqpyz. О́ıtkeni tek baqytty adam ǵana jumysyna qýana baryp, jumysta da tıimdi bolady. Biz «Qazaqstan halqyna» qaıyrymdylyq qoryna 30 mıllıard teńge qarjy aýdardyq. Bizdiń iri metallýrgııalyq kompanııa eńbek adamyna laıyqty jaǵdaı jasaýdy birinshi orynǵa qoıady. Eńbekkerdiń saıly jumys kıimi, tamaǵy, jumys aýysymynan shyqqanda jýynatyn jeri, demalyp-tynyǵatyn orny durys bolýy kerek. Anyǵy sol – jer betinde shahter men metallýrgten aýyr jumys joq. Prezıdentimiz 2060 jylǵa deıin Qazaqstannyń kómirsýtegi beıtaraptyǵyna qol jetkizý mindetin qoıdy. Bir qaraǵanda bul alys sııaqty, biraq ár jylǵa osy saıasatty iske asyrýǵa josparymyzdy qurdyq. Elimizde jasyl energetıkany damytý jospary qolǵa alynǵan soń ony oryndaýymyz kerek», dedi A. Mashkevıch.
ERG kompanııasyna qarasty Dóń ken baıytý kombınaty 40 megavatt elektr qýatyn paıdalanady. Hromtaýdaǵy qatty jynysty hrom keniniń álemde teńdesi joq. ERG osy jerde ken óndiretin Dóń ken baıytý kombınatyna 2 mlrd dollar ınvestısııa salyp, aldaǵy ýaqytta óndiris kólemin jylyna 7,5 mln tonnaǵa jetkizbekshi.
Aqtóbe oblysy,
Hromtaý aýdany