Agrarlyq nesıe korporasııasy AО́K sýbektilerin qarjylandyrýdyń jalpy kóleminiń 40%-dan astamyn nesıe seriktestikteri arqyly rásimdeıdi. Aqtaý qalasynda AО́K nesıe seriktestikteriniń qaýymdastyǵy men Agrarlyq nesıe korporasııasy Nesıe seriktestikterdiń IV forýmyn uıymdastyrdy.
Shaǵyn jáne orta bıznesti qoldaý «Báıterek» holdınginiń «Damý» kásipkerlikti damytý qory, Qazyna Kapıtal Menedjment jáne Agrarlyq nesıe korporasııasy sııaqty enshiles uıymdary arqyly júrgiziledi.
– Korporasııa nesıe seriktestikteri júıesi arqyly qarjylandyrýdyń tıimdi tetikterin jasap, qoljetimdi nesıe ónimderin usynýda. Búginde nesıe seriktestikteri Qazaqstannyń barlyq oblysynda bar, olar 17 myńnan astam kásipkerge qyzmet kórsetip otyr. Nesıe seriktestikteri júıesiniń artyqshylyǵy kóp. Solardyń birqatary: aýyl sharýashylyǵy taýar óndirýshilerine jaqyn ornalasýy, nesıelendirýdiń búge-shúgesine deıin jolǵa qoıylǵan júıesi men nesıe seriktestigi músheleriniń óziniń óńiriniń damýyna qyzyǵýshylyǵynyń artýy, – deıdi «Báıterek» Ulttyq basqarýshy holdıngi» AQ basqarýshy dırektory Nııaz Kóshkimbaev.
Agrarlyq nesıe korporasııasy byltyr nesıe seriktestikterine 109 mlrd teńge bólip, 6,4 myń joba qarjylandyryldy. Onyń ishinde «Keń dala» baǵdarlamasy boıynsha kóktemgi egis jáne kúzgi jıyn-terin jumystaryna 26,5 mlrd teńge, tehnıka men qural-jabdyqtar satyp alýǵa 29,6 mlrd teńge, tórt túlik satyp alýǵa 35,7 mlrd teńge jáne ózge de maqsattarǵa 18,1 mlrd teńge bólindi.
– Bıylǵy jartyjyldyqta 7 myńnan asa sharýaǵa 182,5 mlrd teńgeniń nesıesi berildi. Bul rette qarjylandyrýdyń 43 paıyzy nemese 78,8 mlrd teńgesi nesıe seriktestikterine tıesili. Bıyl nesıe seriktestikterin qarjylandyrýǵa 129 mlrd teńge, al kelesi jyly 140 mlrd teńge bólýdi josparlap otyrmyz, – deıdi «Agrarlyq nesıe korporasııasy» AQ Basqarma tóraǵasy Almat Áshirbekov.
Mańǵystaý oblysynda úsh nesıe seriktestigi jumys isteıdi. Sonyń biri 140-tan asa múshesi bar «Munaıly nesıe» NS. Jyl basynan beri qarjy ınstıtýty jalpy somasy 344,3 mln teńgeden asatyn 18 jobaǵa nesıe berdi.
– Búginde elimizdiń 158 aýdanyndaǵy 206 nesıe seriktestigi 23,5 myń aýyl sharýashylyǵy taýaryn óndirýshisin biriktiredi. Alaıda nesıe seriktestikteriniń oń kórsetkishine qaramastan, jańa zaman jańa jaǵdaıdy talap etedi. Aýyldyq jerler men monoqalalarda shaǵyn jáne mıkrobıznesti qarjylandyrý úshin nesıe seriktestikteriniń áleýetin keńeıtý boıynsha jumys júrgizemiz. Bul qosymsha qorlandyrýdy izdeýdi, apeks qoryn qurýdy, sonymen birge nesıe seriktestikterindegi úderisterdi ońtaılandyrady, – dedi AО́K NS qaýymdastyǵynyń Basqarma tóraıymy Almıra Saǵatova.
AQTAÝ