Tamyz aıynyń úshinshi jeksenbisinde Qazaqstanda sport kúni atap ótiledi. Kásibı mereke qarsańynda Mádenıet jáne sport mınıstri Dáýren Abaev sport salasy qyzmetkerlerin marapattap, olardyń salamatty ómir saltyn damytýǵa jáne nasıhattaýǵa qosqan zor úlesin atap ótti.
«Bizdiń elimizde sport ár túrli jastaǵy, ult pen kásiptegi kóptegen adamdardyń basyn biriktiredi. Jyldan jylǵa sport qaýymdastyqtary men seksııalarynyń sany ósip, sportpen turaqty aınalysatyn azamattardyń sany artyp keledi. Árıne, bul jerde jattyqtyrýshylardyń, tóreshilerdiń jáne sport menedjerleriniń eńbegi zor. Munyń bári olardyń tańdaǵan mamandyǵyna degen yntasy men adaldyǵyna tikeleı baılanysty», dedi Dáýren Abaev.
Saltanatty is-shara olımpıada rezerviniń oblystyq jáne respýblıkalyq mamandandyrylǵan mektep-ınternat-kolledjderiniń jumysy máseleleri jónindegi keńes sheńberinde ótti.
«Qazir mektep-ınternat-kolledjderde taıaý jyldary ótetin iri jarystarda el namysyn qorǵaıtyndar oqyp júr. Bir sózben aıtqanda, sizder Qazaqstannyń sport elıtasyn daıarlap jatyrsyzdar. Biraq ókinishke qaraı, daıarlaǵan shákirtterdiń qazirgi nátıjeleri alańdaýshylyq týdyrady. Kóptegen parametrler boıynsha birqatar mektep-ınternat-kolledjderdiń kórsetkishteri kádimgi sport mektepterinen tómen. Bul jattyǵý prosesinde, psıhologııalyq daıarlyqta, oqytý ádisnamasynda olqylyqtardyń bar ekenin bildiredi», dedi mınıstr.
Onyń aıtýynsha, mektepterdegi kadr máselesine erekshe nazar aýdarý qajet. Mektep-ınternat-kolledjderde úzdik jattyqtyrýshylar men ádiskerler jumys isteýge tıis.
Dáýren Abaev sondaı-aq mektep-ınternat-kolledjderge oqýshylardy qabyldaý kezinde baqylaýdy kúsheıtýdi, joǵary synyp jáne kolledj sportshylarynyń nátıjelerine júıeli taldaý jasaýdy, sondaı-aq qarjylyq jaǵdaı men bilikti mamandardyń bolýyn eskere otyryp, sport túrlerin ońtaılandyrýdy qarastyrýdy tapsyrdy.