Májilis depýtattary Mádı Elıýbaev pen Iýlııa Kýchınskaıa Aqmola oblysynyń Arshaly aýdanyna qarasty «Jibek joly» aýylyndaǵy 300 oryndyq mekteptiń qurylys barysymen tanysty. Bul jóninde palatanyń baspasóz qyzmeti habarlady.
Bilim berý nysany Amanat partııasynyń saılaýaldy baǵdarlamasyn oryndaýdyń Jol kartasyn iske asyrý aıasynda qolǵa alynǵan. Sondyqtan nysannyń sapaly ári óz ýaqytynda aıaqtalýy partııa baqylaýynda tur. Mekteptiń qurylysy 2020 jyly bastalyp, bıylǵy oqý jylynyń basynda, ıaǵnı qyrkúıekte tapsyrylýy kerek bolatyn. Merdigerdiń aıtýynsha, qurylys materıaldarynyń qymbattaýy saldarynan jobalyq-smetalyq qujatty qaıta túzetý qajet bolǵan. Sonyń saldarynan qurylys jumysy keshiktirilgen.
Májilis depýtaty Iýlııa Kýchınskaıanyń pikirinshe, máseleniń túpki sebepteri memlekettik satyp alý týraly zańynyń shıkiliginen bolyp otyr. «Biz partııanyń saılaýaldy baǵdarlamasy aıasynda qolǵa alynǵan qurylys nysandaryna monıtorıng júrgizý barysynda memlekettik satyp alý týraly zańynyń shıkiliginen týyndaǵan birshama olqylyqty baıqadyq. Biz tek monıtorıng júrgizip, nysandy ýaqytynda tapsyrmaǵan merdigerdi jazalaýdy maqsat tutpaımyz. Negizgi maqsatymyz – zańdardy jetildirý. Qandaı zańda, nendeı olqylyqtaryn baryn anyqtaýǵa tyrysyp otyramyz. Máselen, búginde «Memlekettik satyp alý týraly» Zańnyń jetilmegendigin baıqadyq. Odan qaldy qurylys nysandaryn salýdy josparlaý júıesi de naqty emes. Olaı deıtinim, merdigermen áńgimelesý barysynda jobalyq-smetalyq qujattamanyń áýelde-aq sapasyz ázirlengenin, geologııalyq barlaýmen baılanysty problemalar anyqtalǵanyn bildik. Kelesi sessııadaǵy jumys aıasynda biz osy máselelerdi kóteremiz. «Memlekettik satyp alý týraly» Zańdy jetildirý boıynsha Memleket basshysy birneshe ret tapsyrma berdi. Bul taqyryp depýtattardyń aınalysatyn negizgi baǵyttarynyń biri», dedi Iýlııa Kýchınskaıa.
О́z kezeginde, qurylys nysanynyń bas merdigeri «Dostar» kópsalaly kompanııasynyń ókili Aslan Nábıev mektepti jeltoqsan aıynda aıaqtaýǵa tyrysamyz dep otyr.
Májilis depýtaty Mádı Elıýbaev mekteptiń qurylysy aýyldaǵy úsh aýysymda oqý máselesin birshama sheshýge kómektesetinin alǵa tartty. Depýtattardyń aıtýynsha, elorda mańyndaǵy eldi mekenderdegi eń negizgi problema turǵyndarynyń resmı tirkelmegendiginen týyndap otyr. Máselen, «Jibek joly» aýylyndaǵy jergilikti halyqtyń sany resmı derek boıynsha 10 myńnyń aınalasynda bolsa, shyndap kelgende, turǵyndar odan eki ese kóp.
Bul óz kezeginde elorda aınalasyndaǵy aýyldarda áleýmettik ınfraqurylymdardyń jetispeýshiligine alyp kelýde. Sondyqtan halyq qalaýlylary aldaǵy ýaqytta aglomerasııalardy damytý týraly zańdy jetildirý qajet dep sanaıdy.
Jalpy, «Jibek joly» aýyldyq okrýginde búginde eki mekteptiń qurylysy júrýde. Ekeýi de 300 orynǵa shaqtalǵan. Májilis depýtattary mektep qurylysynyń jyldyń sońyna deıin jyldam ári sapaly oryndalýyn baqylaýda ustaıtyndaryn aıtty.