Sybaılas jemqorlyqqa qarsy is-qımyl agenttigi kásipkerlik sýbektilerin qorǵaý jónindegi jumys tobynyń keńeıtilgen otyrysyn ótkizdi, dep habarlaıdy Egemen.kz Antıkorǵa silteme jasap.
Otyrysqa Sybaılas jemqorlyqqa qarsy qyzmettiń barlyq jedel-tergeý quramy, «Atameken» UKP Basqarma tóraǵasynyń orynbasary Erbol Ústemirov jáne óńirlik palatalardyń ókilderi qatysty.
Adal kásipkerlerdi qylmystyq qýdalaý sheńberine negizsiz tartýǵa jol bermeý, tergeý áreketterimen shamadan tys qysym kórsetý boıynsha oń jumys nátıjeleri talqylandy.
Atap aıtqanda, tergeýge nuqsan keltirmeı, qylmystyq prosesti ońtaılandyrý arqyly kásipkerlerdi Sybaılas jemqorlyqqa qarsy qyzmettiń qylmystyq isteri boıynsha 900-ge jýyq tergeý áreketinen qorǵady.
«Bıznesmenderdi, kommersııalyq fırmalardyń qyzmetkerlerin shaqyrý eki ese qysqardy. Bul jumys Agenttik Tóraǵasynyń 13 shildedegi buıryǵyna sáıkes sotqa deıingi tergep-tekserýdi uıymdastyrý jónindegi nusqaýlyq arqyly júrgiziledi.
Vedomstvolyq qujat sotqa deıingi tergep-tekserý qaǵıdalarymen qatar kásipkerlik sýbektilerin qorǵaýǵa arnalǵan arnaıy taraýdy qamtıdy», delingen habarlamada. Sonymen qatar sybaılas jemqorlyqqa qarsy qyzmet pen Ulttyq palatanyń bızneske quqyqtyq kómek kórsetý boıynsha birlesken jumysy tanystyryldy. Keńeste kásipkerlerdiń neǵurlym problemalyq ótinishteri boıynsha keıstik mindetter qaraldy. Birqatar aýmaqtyq departamenttiń basshylaryna olar boıynsha naqty, jan-jaqty sharalar qabyldaý tapsyryldy.
«Kásipkerlerdiń ótinishterin ýaqytyly qaraý úshin memlekettik organdar tarapynan olardyń qyzmetine zańsyz aralasýǵa baılanysty ótinishterdi qaraý boıynsha bıznespen onlaın kezdesýlerdi Ulttyq palatamen birlesip júıeli negizde ótkizý týraly sheshim qabyldandy.
Otyrys qorytyndysy boıynsha kásipkerlik sýbektilerin qorǵaý jónindegi jumysty odan ári jetildirý boıynsha usynystar ázirlendi», dep habarlady agenttikten.