Aýylda shaǵyn traktorlar shyǵarylady

Erlik Taıshybaev – Maı aýdanynyń turǵyny. Shaǵyn traktordy qurastyrý ıdeıasy oǵan bir kúnde kele qalǵan joq. Ieliginde óndiristik baza, arnaıy alań jáne metalmen jumys isteýge arnalǵan qural-jabdyqtary jetkilikti bolǵan soń aýyldastaryna tehnıkalyq turǵydan kómektesýdi oıǵa alypty. Sóıtip, aldyna bir ózi ondaǵan jumys túrin atqara alatyn ári baǵasy arzan shaǵyn traktor qurastyrsam degen maqsat qoıady. Aýyldyq bızneske tehnıka qurastyrý lısenzııasyn satyp alý qarjylyq turǵydan tıimsiz ári úlken óndiris ashý da yńǵaısyz. Sondyqtan tym bolmaǵanda jylyna keminde 50 traktor shyǵaratyn shaǵyn óndiris ashsam dep jatsa-tursa armandaıdy.

Sóıtip, kúnderdiń kúninde YouTube platformasynan reseılik ınjener­diń kýrstaryn kózi shalyp qalmasy bar ma. Ol jasaǵan tehnıkanyń qara­paıymdylyǵy unap, avtorǵa habarlasyp qajetti syzbalaryn surap alǵan. Al traktorǵa qajet qosymsha bólshekter men qozǵaltqyshty satyp alý úshin «Bıznestiń jol kartasy-2025» baǵdarlamasy arqyly utyp alǵan 5 mln teńge grantty paıdalandy.

Búginde «Dımash» jeke kásip­ker­liginiń óndiristik bazasynda «Jumysker» dep atalatyn 2 shaǵyn traktor qurastyrylyp shyqty. Ámbebap tehnıka 15 túrli jumysty atqara alady. Shópti shaýyp, jınaý, kartop otyrǵyzý, qysta qar kúreý sııaq­ty taǵysyn-taǵy aýyldyń bir bitpeıtin sharýalaryn lezde dóńgeletip tastaýǵa bolady.

– Aýyldyń tirligi tehnıkasyz bitpeıdi. Shóp shabýǵa, qı oıyp, kóń shyǵarýǵa, qar taza­laýǵa, aıta berseń barly­ǵyna mashınanyń kómegi kerek. Traktoryma patent aldym. Endi tıeýish shómish, qar kúregishter, arnaıy asha jasap jatyrmyn. Tehnıkanyń jebesi 300 kılogramdyq júkti úsh metrge deıin kóteredi. Bul ózi «metıs» traktor bolǵaly tur, birneshe tehnıkanyń ból­shekterinen qurastyrylǵan. Beldik temiri men berilis qora­byn, rýliniń kolonkasyn «Jı­gýlıden» ıemdenip aldyq, al qoz­ǵaltqyshy Qytaıda jasa­latyn «Lıfan Braıd» dep ata­latyn 15 attyń kúshi bar agregat. Dóńgelekterin de eski Vaz kóliginen aldyq. Kólikti qu­ras­tyrýda ınjenerlik tur­ǵydan arzan ári tıimdi jol­daryn izdestirdik, – deıdi kásipker.

Traktordyń bazalyq túri 3 mln teńgeden bastalady. Aı­týyn­sha, sońǵy jarty jylda qajetti qosalqy bólshek­ter tym qymbattap ketken. Son­dyq­­tan baǵasyn biraz ústeme­leýge týra kelipti. Bir ózi úlken trak­torlardyń jumysyn tyndyryp júre beretin shaǵyn tehnıkanyń artyqshylyǵy kez kelgen qýysqa enip ketetin­di­ginde. Qozǵaltqyshy benzınmen júretindikten qysta qa­typ qalady-aý dep qorqýdyń da qajeti joq. Qańqasy shveller temirden jasalǵandyqtan tózimdi ári aýyr, júk tartý ke­zin­­de de basymdyqqa ıe, dep atap ótti qurastyrýshy. Mun­daı traktordyń búginde Qazaq­stan boıynsha birneshe úlgisi kezdesedi. Deı turǵanmen Maı aýdanynda qurastyrylatyn tehnıkanyń kóptegen artyq­shy­lyǵy bar. Máselen, kóter­gishtiń jebesine bytyra mo­ıyn­tirek presteledi. Ádette quras­tyrýshylar ol jerge qa­ra­paıym bilik qoıa salatyny bar. Bilik biraz ýaqyttan soń jelinip, ja­ńartýǵa týra keledi.

Saǵatyna 15 shaqyrymǵa de­ıin jol júretin, salmaǵy 700 kılogramm ámbebap tehnıkanyń birin búginde aýdandyq ákimdik satyp alýǵa bel baılap otyr. Ja­qyn kúnderi agregat arnaıy patent alyp, sertıfıkatqa ıe bolǵan soń ony sýbsıdııalanatyn aýyl sharýashylyǵy tehnıkalary tizimine qosý da josparda tur. Eger tehnıka bıyl qysta sy­­naq­tan sátti ótse, óńirdiń ­aýyl­ sharýa­shylyǵyna jaýapty me­ke­meler ony jarnamalaý isine atsa­lyspaq nıette.

Atap óterligi, kezindegi Pav­lodar traktor zaýyty jo­ıyl­­ǵaly «Jumysker» óńir­de alǵash bolyp tolyq quras­ty­rylǵan ári patentke ıe bolǵan jalǵyz shaǵyn traktor. 2019 jyly qy­taı­lyq Wan E kompanııasymen kelisimshart negizinde oblys ortalyǵynda Qytaı eliniń mashınalary qurastyrylady dep kútilgen edi. «Pavlodar» arna­ıy ekonomıkalyq aımaǵynda salynýǵa tıis óndiris jobasy sol kúıi qaǵaz betinde ǵana qal­dy. Bul turǵydan alǵanda aýyl kásipkeriniń batyl bastamasy qoshemetteýge turarlyq.

Pavlodar oblysy