Qazaqstannyń halyq jazýshysy, Memlekettik syılyqtyń laýreaty, qazaq ádebıetiniń klassıgi marqum Qabdesh Jumadilovtiń óz ósıeti boıynsha jerlengen jeri – búgingi Abaı oblysynyń Úrjar aýdany Taskesken aýylynda, jurt «92 shaqyrym» atap ketken toǵyz joldyń túıisken tóbesinde turǵyzylǵan eńseli aq kúmbezdiń ashylý sharasy ótip, as berildi.
«Qabdesh Jumadilov» qoǵamdyq qory tóraǵasynyń orynbasary, belgili jazýshy Ǵalym Qalıbekulynyń aıtýynsha, bıiktigi 14 metrlik eskertkish-keseneni Semeı óńirindegi isker azamattar – Áset Ulyqpanuly, Erlan Myrzahmetuly, Sezbek Raqyshuly bastap qarjy toptap, bir jylǵa jetpeıtin ýaqytta salyp shyǵypty. Kásipker jigitterdiń eńbegin elep-eskerip, qor tóraǵasy akademık, professor Ulyqpan Sydyqov alǵys hatpen marapattap, Jumadilovter áýleti atynan ıyqtaryna shapan japty. Taskesken aýylynda mádenı is-shara ótip, 300 adamǵa arnap as berildi. Eldiń túkpir-túkpirinen kelgen qadirli meımandar men zııaly qaýym ókilderi estelikter aıtyp, jazýshyǵa degen shynaıy qurmetin bildirse, jazýshynyń jary Sáýle Áýkenqyzy jalpaq jurtqa rahmetin aıtty. Qabdesh Jumadilov Shyǵys óńiriniń týmasy, Tarbaǵataı, Zaısan, Aıagóz, Úrjar aýdandarynyń Qurmetti azamaty bolǵan. Úrjar aýdanynyń ákimi Nurjan Toqseıitov sózin «Uly jazýshy áýlıe kisi eken, alpys, jetpis jastaǵy mereıtoıynda osy jerge jatatynyn ósıet etip ketipti. Qazir ári ótken, beri ótken jolaýshy Qabeńniń basyna toqtap zııarat etetin qasıetti oryn boldy. Bizdiń elge kıeli rýh qondy» dep bastap kesene qurylysyna atsalysqan qarapaıym azamattarǵa alǵys hat berip, qoshamet kórsetip, joǵaryda attary atalǵan Áset, Erlan, Sezbek jáne Ǵalymnyń keýdesine Úrjar aýdanynyń eń joǵary nagradasy – «Abyroı» medalin taqty. Úrjar aýdandyq máslıhatynyń sheshimimen kúni keshege deıin «92 shaqyrym» atalǵan jerdiń aty «Qabdesh beketi» dep ózgertildi. Qor tóraǵasynyń aıtýyna qaraǵanda, byltyr jazýshy ómirden óte sala turǵan úıine eskertkish taqta ornatypty, bıyl mine, basyna aqshańqan kúmbez turǵyzypty, alda kórnekti jazýshynyń 20 tomdyq shyǵarmalar jınaǵyn shyǵarýdy qolǵa almaq eken.