Eleýsiz qalmaǵan batyldyq

Ishki ister mınıstriniń orynbasary – Ulttyq ulannyń Bas qolbasshysynyń buıryǵymen kishi serjant Aıbat Esirkep pen qatardaǵy jaýynger Oralbek Jıenbaı «Qazaqstan Respýblıkasynyń quqyqtyq tártip áskerine – 30 jyl» medalimen marapattaldy. Sondaı-aq qatardaǵy ja­ýyngerler Nurbol Tileýbek pen Erbolat Qanatbekke astanalyq jedel qurama komandıriniń gramotasy tabys etildi.

Jaýyngerlerge marapatty saltanatty túrde Ulttyq ulan Bas qolbasshysy­nyń tárbıe jáne áleýmettik-quqyqtyq jumystar jónindegi orynbasary, Halyq qaharmany, polkovnık Qaırat Úmbetov tabys etti. Bas tárbıeshi sarbazdarǵa batyl is-áreketteri úshin alǵys bildirip, aǵalyq aq tilegin jetkizdi.

– Búginde Ulttyq ulannyń jeke qu­ramy ózderine júktelgen jaýyngerlik mindetterdi abyroımen atqaryp keledi. Biz­diń sarbazdarymyzdyń bul áreketi ulan­dyqtardyń antqa adal ekenin jáne azamat­tardyń quqyqtary men qaýip­siz­digin qorǵaýǵa aıtarlyqtaı úles qosaty­nyn taǵy da dáleldedi. Sol kúni olar jan­qııarlyq tanytyp, óz ómirlerin qaterge tigip, batyldyqtyń jarqyn úlgisin kór­set­ti. Olardyń úılesimdi áreketteriniń arqa­synda adam ómiri aman qaldy. Barlyq jas jaýyn­gerge qyzmette tabys, bar­lyq bas­ta­malaryna sáttilik, laıyqty qyzmet jáne úılerine aman-esen oralýyn tileımin, – dedi polkovnık Q.Úmbetov.

Esterińizge sala keteıik, oqıǵa 9 tamyzda bolǵan edi. 5573 áskerı bóliminiń áskerı jasaǵy patrýldeý barysynda er adam­nyń Esil ózeniniń jaǵalaýy jaǵy­nan kómek surap aıqaılaǵanyn estip qala­dy. Ulandyqtar jedel ári batyl áreket­terimen sýǵa batyp bara jatqan azamatty sýdan shyǵaryp, alǵashqy medısınalyq kómek kórsetken.