Elimizde uıymdastyrylǵan VIII Halyqaralyq armııa oıyndary aıaqtaldy. On kún boıy sarbazdar túrli taktıkalyq saıysta ózara kil myqtyny anyqtady. Júldegerler Qarýly Kúshterdiń Ulttyq áskerı-patrıottyq ortalyǵynda marapattaldy.
Bıyl armııa oıyndaryna otandyq sarbazdarmen qatar, Ázerbaıjan, Armenııa, Belarýs, Venesýela, Iran, Vetnam, Zımbabve, Qytaı, Qyrǵyzstan, Malı, Reseı, Tájikstan jáne О́zbekstan Qarýly Kúshteriniń ókilderi qatysýǵa nıet bildiripti. Saltanatty ashylý saltanatynda Zımbabve sarbazdarynyń sahnaǵa shyǵyp, bılegen sáti este qalǵan edi. Al naǵyz aıqasta kim úzdik shyqty eken?
«Artıllerııalyq atys sheberleri», «Taktıkalyq atqysh», «Merıdıan» konkýrstary Jambyl, Qaraǵandy, Aqmola oblystaryndaǵy úsh oqý-jattyǵý polıgonynda ótti. Úsheýinde de jarys qojaıyndary – Qazaqstannyń áskerı qyzmetshileri jeńiske jetti.
«Artıllerııalyq atys sheberleri» saıysynda Reseıdiń áskerı qyzmetshileri ekinshi oryndy ıelense, úshinshi orynǵa Ázerbaıjannyń artıllerısteri turaqtady. «Taktıkalyq atqysh» saıysynda ekinshi satyǵa Qytaı komandasy jaıǵassa, úshinshi oryndy О́zbekstan men Reseı quramalary ózara bólisti. «Merıdıan» saıysynda qytaılyqtar kúmispen kúptelse, О́zbekstan men Belarýs komandalaryna úshinshi oryn buıyrdy.
Jarys jeńimpazdary men júldegerleri medaldarmen jáne dıplomdarmen marapattaldy. Sonymen qatar ár konkýrsta jeke nomınasııalar boıynsha jeńimpaz atanǵandarǵa da arnaıy marapattar tabystaldy. Marapattaý sharasyna Qorǵanys mınıstriniń birinshi orynbasary – Qarýly Kúshteri Bas shtabynyń basshysy, general-leıtenant Marat Qusaıynov qatysyp, jyl saıynǵy halyqaralyq áskerı-sporttyq jarystardyń áskerı qyzmetshilerdiń jaýyngerlik daıarlyǵy men sheberligin jetildirýdegi mańyzy zor ekenin atap ótti.
Sońǵy jyldary halyqaralyq armııa oıyndaryn ótkizýde ózindik ıgi dástúr qalyptasty. Oıyndar sheńberinde qatysýshy elderdiń áskerı qyzmetshileri qarym-qabiletin shyńdap, tájirıbe almasý arqyly kásibı deńgeıin arttyra túsýde. Jalpy, XXI ǵasyr armııasynyń negizgi maqsaty álemniń ár túkpirinde beıbitshilikti saqtaý ekeni sózsiz. Onyń ústine áskerı sarapshylar halyqaralyq oıyndardy áskerı dıplomatııanyń jańa belesi dep sanaıdy. О́ıtkeni áskerı-sporttyq alańdarda tanysyp, ózara básekege túsetin qatardaǵy áskerı qyzmetshilerdiń dostyq qarym-qatynasy árdaıym joǵary baǵalanyp keledi.