Kóshi-qon kóńilden shyqpaı tur

Jumyspen qamtý ortalyǵynyń kómegimen bıylǵy 7 aıda Soltústik Qazaqstan oblysynda barlyǵy 9 548 adam jumysqa ornalastyrylǵan. So­nyń ishinde ortalyqtar arqyly ornalas­qan­dardyń sany 6 myńǵa jýyq. Alaıda óńirde ulttyq jobalar sheńberinde jańa jumys oryndaryn ashý kórsetkishi tómen, barlyǵy – 596. Qyzyljar jáne Taıynsha aýdandarynda bul jumys múldem júrgizilmeıdi, Esil, Aıyrtaý, Shal aqyn aýdandaryndaǵy kórsetkish óte tómen. Jýyrda oblysqa kelgen Eńbek jáne halyqty áleýmettik qorǵaý mı­nıstri T.Dúısenova jumysqa ornalastyrý mindetti zeınetaqy aýdarymdarymen rastalatynyn aıta kelip Soltústik Qazaqstan oblysynda bul kórsetkish 59 paıyz ǵana ekenin aıtty. Sonyń ishinde oblystyq deńgeıdegi eń tómengi kórsetkish Mamlıýt (37%) pen Qyzyljar (38,2%) aýdandaryna tıesili bolyp otyr. «Al kásipkerlikti qoldaý jobasyn qospaǵanda, Ulttyq jobalar sheńberinde Maǵjan Jumabaev, Mamlıýt jáne Ýálıhanov aýdandarynda jumysqa ornalasqandardyń birde-bireýi zeınetaqy jarnalaryn aýdarmaǵan», dep atap ótti mınıstr.

Bıylǵy 7 aıda Soltústik Qazaq­stan oblysynyń óńirlik kartasynda jos­parlanǵan 2 166 turaqty jumys or­nynyń tek 437-si ashylǵan, bul 10,7% ǵana quraıdy. Al Aıyrtaý, Maǵjan Jumabaev, Ǵabıt Músirepov, Esil, Qyzyljar, Mamlıýt, Taıynsha aýdandarynda tipti birde-bir jańa jumys orny ashylmaǵan.

Jergilikti atqarýshy bılik or­gan­darynyń ókilderimen kezdes­kende mınıstr múgedek jandardy qoldaý, sonymen qatar zeınetaqy jáne áleýmettik qamsyzdandyrý máselelerin talqylady. Otbasynyń sıfrly kartasyn ázirleý boıynsha júrgizilip jatqan jumystar týraly habardar etti. Soltústik Qazaqstan oblysynda qazir 208 myńnan astam otbasy bar, olardyń 99,6 myńnan astamynyń turmys jaǵdaıy nashar. Bul óte nashar kórsetkish. Eńbek jáne áleýmettik qorǵaý mınıstrligi júrgizgen saraptamaǵa qaraǵanda, ózderine tıisti kómekti ala almaıtyn otbasylar da bar. Mundaı otbasylar 1 qyrkúıekten bastap memleket tarapynan ózderine kórsetiletin kómek týraly sms-habarlamalar alatyn kórinedi.

Osy jáne basqa máseleler boıynsha birneshe aýdannyń jáne salalyq qyzmetter basshylarynyń usynys-pikirleri tyńdaldy. Mınıstrliktiń qatysýynsyz sheshilmeıtin keıbir máseleler boıynsha mınıstr oń sheshimder qabyldanatynyn jetkizdi.

Jumys kúshi artyq óńirlerden soltústikke qonys aýdarýshylarǵa úlken jeńildikter berilip, kóshi-qon shyǵyndary úshin aqsha tólenedi, turǵyn úıler beriledi, jalǵa alýǵa sýbsıdııalar bólinedi, kásipkerlik bas­tamany qoldaý úshin jeńildetilgen nesıeler beriledi. Alaıda kósh ázirge qaýyrt bolmaı otyr. Soltústiktiń salqyny ońtústiktiń jaımashýaq klımatyna úırengen jandar úshin áli de alynbaıtyn qamal bolyp tur. О́tken jyly 4 myńǵa jýyq adamy bar 1 147 otbasyn kóshirý belgilense, 7 aıda sonyń 47 paıyzy ǵana kóship kelgen. Kúzdiń yzǵyryǵy bastalǵanda qalǵan jurttyń kóship kelýi neǵaıbil. Jas balalaryn dirdektetip jańa jerge qonystanýǵa kóp adamnyń táýekel etpesi anyq.

Jańa geosaıası jaǵdaıdy eskere otyryp, Eńbek jáne halyqty áleý­met­tik qorǵaý mınıstrligi «Ashyq Qa­zaq­stan 500+» kóshi-qon saıasatynyń tujyrymdamasyn qalyptastyrǵan. Ol elimizge bilikti kadrlardyń kelýin yntalandyrýdy, shetelde jumys isteıtin qa­zaq­standyqtardyń quqyqtaryn qor­ǵaý­dy jáne el óńirleri arasyndaǵy demografııalyq teńsizdikti joıý te­tik­­teriniń tıimdiligin arttyrýdy kóz­deı­di. «Jańa tásilderdiń maq­sa­ty aza­mattardyń jumys oryndary joq jer­lerge kóshýinde ǵana emes, transfert arqyly jumys oryndaryn qurý jáne basqa oblys­tarda qoldanystaǵy bıznes-jobalardy soltústik óńir­ler­de keńeıtý bolyp tabylady. Sondyqtan «Soltústik óńirler úshin 100 bıznes-joba» bıznes bastamasyn qurý bo­ıynsha barynsha áleýeti bar tıisti bıznes-ıdeıalar konkýrsy arqyly qoldaý usynylady», dedi Tamara Dúısenova bıznes ókilderimen kezdes­kende. Bul habarlarǵa birshama bıznesmender eleńdep, naqtylaý suraqtaryn berip jatty. Túrkistan oblysynan kelgen «Amangeldi» JShS basshysy Nurlan Quralov jergilikti bıliktiń qoldaýymen Soltústik Qazaq­stan­da aýyl sharýashylyǵy ónimderin qaıta óńdeý óndirisin ashýǵa daıyn ekenin bildirdi. «Eger biz soltústikte birlesken kásiporyn nemese óz kásip­or­nymyzdyń fılıalyn ashsaq jáne bizge jeńildetilgen kredıtter men bos ǵımarattar berilse, onda soltústikte aýyl sharýashylyǵy ónim­de­rin óńdep, ony búkil Qazaqstanǵa ǵana emes, Re­seı­ge de satýǵa bolady dep sanaımyn. Eger jeńildikti nesıe uzaq merzimge beriletin bolsa, onda biz ońtústikten 50-100 adamdy alyp kelip, soltústikte jumys oryndaryn ashýǵa daıynbyz», dedi ol.

Soltústik Qazaqstan oblysy