M.Dýlatov atyndaǵy Qostanaı ınjenerlik-ekonomıkalyq ýnıversıtetinde Qazaqstan halqy Assambleıasynyń kafedrasy ashyldy. Onyń tusaýkeserine Qazaqstan halqy Assambleıasy Tóraǵasynyń orynbasary, Parlament Senatynyń depýtaty Anatolıı Bashmakov, onyń senator áriptesteri Hýsaın Valıev pen Jeńis Nurǵalıev qatysty.
Kafedranyń ashylý saltanatynda mazmundy sóz sóılegen A.Bashmakov ulttar men ulystardyń tatýlyǵyn, birligin saqtaý búginde álemdik sıpat alyp otyrǵan ózekti másele ekendigine toqtaldy. Onyń mysalyna Ýkraınadaǵy jaǵdaıdy keltirdi.
– Bizdiń Elbasymyz Nursultan Nazarbaev memleket Táýelsizdiginiń alǵashqy kúninen bastap, elimizdegi túrli ulttar ókilderiniń birligin eń birinshi másele etip qoıdy. Birligi bar el ozady. Qazir álemdegi ekonomıkalyq, qarjylyq, ekologııalyq daǵdarystardyń barlyǵy da halyqtar tatýlyǵy oryn alǵanda ǵana durys sheshimin tabady. Sol úshin bizdiń óz dástúrimiz, tilimiz túp-tamyrynan ajyramaǵanda ǵana ulttar tatýlyǵy múmkin bolady. Ol úshin Elbasymyz barlyq jaǵdaıdy jasap otyr,– dedi Anatolıı Afanasevıch.
Ýnıversıtet rektory Sábıt Esmuratov jurtshylyqqa kafedranyń ashylý maqsaty memlekettik etnosaıasat mindetterin iske asyrý, jastardy toleranttylyq jáne etnosaralyq kelisim rýhynda tárbıeleý ekenin aıtyp ótti. Qazaqstandaǵy joǵary oqý oryndarynda ashylǵan bul úshinshi kafedra bolyp sanalady. Onyń meńgerýshiligine oblysta memlekettik jáne sharýashylyq qyzmetter atqarǵan, ómirlik tájirıbesi mol azamat Mıras Nurǵalıev bekitildi.
M.Dýlatov atyndaǵy Qostanaı ınjenerlik-ekonomıkalyq ýnıversıtetinde ashylǵan kafedra oblystyq Qazaqstan halqy Assambleıasynyń negizgi ádistemelik ortalyǵy bolady.
Názıra JÁRIMBETOVA,
«Egemen Qazaqstan».
QOSTANAI.