Shekspırdiń otanyna arnaldy

Kórme ekspozısııasyna avtordyń 2005-2014 jyldar aralyǵynda salǵan 30-dan astam grafıkalyq týyndysy engen. Ataýy aıtyp turǵandaı, kór­me Ý.Shekspırdiń Otany – Anglııaǵa ar­nalǵan. Týyndyger ataǵy álem tarıhy­nan oryn alǵan áıgili mekende ple­ner­de jumys isteı júrip, London peı­zaj­darynyń ózindik ereksheligin názik ıirimmen jetkize bilgen. Muqatov zamanaýı qalanyń kúndelikti ómiriniń kóp­qyrly sıpatyn, onda turatyn adam­dardyń bet-beınesin, olardyń turmys-tirshiligin dál bederleýge kúsh salǵan.

Kúndelikti ómir shyndyǵyn qarapa­ıym, demokratııalyq motıvtermen dálel­deı otyryp, ol «Vaterloo kópirindegi jel­di kún», «Eýston kóshesindegi jań­byr», «Soho alańyndaǵy qyzyl úı» akva­relderinde sýrettiń shynaıy se­nim­diligine qol jetkizedi. Avtor «Kesh­ki Temza jaǵasynda», «Qyzyl avto­býsty kóshe» kartınalarynda estetı­ka­lyq turǵydan shynaıy, zamanaýı ómirdi óziniń tabıǵılyǵymen, barlyq baılyǵy men tústeriniń jarqyraýymen kórsetedi. Kóz aldyndaǵy álemdi ózine tán turaqty qubylmalylyǵymen sıpattaı otyryp, adam men onyń qorsha­ǵan ortasynyń birligin qaıta jasaıdy. Ásirese kezdeısoq kózge túsken ómirdiń úzdiksiz aǵymynyń ótpeli sátine nazar aýdarady.

«T.Muqatov «Jaýyn aldynda», «Kógal­­da», «Ormandaǵy alańqaı», «Baq­ta» peızajdarynda jekelegen bólshek­terge boı aldyrmaı, kórilgen nárseniń qaıtalanbas sıpatyn «saqtap qalýǵa» múmkindik beretin «alǵashqy áserdiń» aıqyndyǵyn, kúshi men jańalyǵyn saq­taýǵa tyrysady», deıdi kórme jetekshisi Erkejan Omarova.

Tabyldy Muqatov kópshilik qaýymǵa kitap ıllıýstratory retinde de jaqsy tanys. Ol bezendirgen eńbekter qazaq aqyn-jazýshylarynyń shy­­ǵarmalaryndaǵy bir­­qa­tar ulttyq beı­­ne­­ni jasaýǵa sep­tigin tıgizdi. M.Áýe­zov, I.Jan­súgi­rov, S.Júni­sov sııaq­ty bel­gili jazý­shy­lar­dyń jınaq­ta­ryn re­simdeýmen aına­lys­qan sheber kitap­tar­dyń estetıkalyq hám kórkemdik qýatyn art­tyrýǵa zor úles qos­ty. Mahambet О́te­mis­ulynyń 200 jyl­dyǵyna oraı ja­ryq kórgen aqyn óleń­deriniń biregeı basy­ly­my 2003 jyly IýNESKO-nyń altyn medaline ıe boldy. Qazaq perzentiniń qoltańbasy Bolgarııa, Danııa, Germanııa, Anglııa, Fransııa elderindegi kórkem kolleksııalarda jarqyrap tur. Sulý ónerden qol úzbegen sýretshi qazir Almatyda turady.

ALMATY