Skeıtbordıng AQSh-tyń Kalıfornııasynda ótken ǵasyrdyń 40-50-shi jyldarynda paıda bolǵan eken. Sporttyń bul túrin Halyqaralyq olımpıada komıteti resmı sport retinde tanyp, 2020 jylǵy Tokıo olımpıadasynyń baǵdarlamasyna engizgen.
Taıaýda Qaraǵandy oblysyndaǵy Abaı qalasynda osy sportqa arnalǵan jańa skeıt-alań ashyldy. Ol «Jiger» stadıony mańyndaǵy saıabaqta ornalasqan. Endi munda skeıtbord, skýter jáne BMX velosıpedterin tebetin ekstremaldy sport áýesqoılary óz sheberlikterin jetildire alatyn bolady.
«Abaı aýdanynyń sport klýby» KMQK dırektorynyń orynbasary Sáýle Qojahmetova qurylys jumystarynyń bıylǵy maýsym aıynda bastalyp, tamyzda aıaqtalǵanyn málim etti.
– Balalar men jasóspirimderdiń qýanyshynda shek joq. Kúnde alańda júretin olardyń qarasy da mol. Aıta ketetin jaıt, skeıt-alańda barlyq mindetti qaýipsizdik erejeleri qatań saqtalady, – dep atap ótti ol.
Jańadan salynǵan skeıt-alańda kásibı veloshabandozdarmen qatar sporttyń osy túrin meńgerýdi jańadan bastaǵandar da óz sheberlikterin ushtaı alady.
Jalpy, Qaraǵandy oblysynyń qalalary men aýyldarynda buqaralyq sportty damytý jolynda qyrýar sharalardyń atqarylyp jatqanyn aıta ketken lázim. Abaıdaǵy skeıt-alań sııaqty basqa da sport túrleri nysandarynyń kóptep salyna bastaǵany osynyń aıqyn dáleli.
Qaraǵandy oblysy,
Abaı aýdany