Sol kúni soltústikqazaqstandyq kásipker Jolaman Ahmetov (aty-jóni ózgertilgen) banktegi depozıttik shotynda jatqan 15 mln teńgesinen bir-aq sátte aıyrylyp qalarmyn dep oılamaǵan edi. Tirnektep jınaǵan aqshasyn ol óndiriske salmaı, balasyna astanadan páter satyp ápermek bolǵan. Bıyl astyq jaqsy shyqty, shashpaı-tókpeı jınap alsam, depozıttegi aqshamdy eselep, birinshige baratyn úlken nemereme arnadym dep astanadan bir kórikti úıge qol jetkizbek edi...
...Jumysqa barmaq bolyp úıden shyqqan jigitti shyr ete qalǵan belgisiz nómir selk etkizdi. Oǵan samarqaý kóz tastap, kerenaýlaý kóńilmen basyp edi, ar jaqtan munyń aty-jónin jańylmaı aıtqan bireý bastyrmalatyp ketti. Jańa ǵana eske alǵan depozıttegi aqshasyn bireý qoldy qylmaq bolǵan eken. Habarlasyp turǵan myna kisi banktiń qaýipsizdik qyzmetinen bolǵandyqtan der kezinde ustapty. Biraq depozıtti tolyq qaýipsizdendirý úshin aqshańyzdy myna shotqa dereý aýystyrýyńyz kerek dep bul jaýap bergenshe, vatsappen jańa shottyń nómirin de jiberip úlgerdi.
Jolaman ańqaý jigit emes edi, tipti keıbir alaıaqtardyń qylyqtaryn da estip júretin. Alaıda 15 mln teńge depozıtińizden aıyrylyp qalǵaly tursyz degen sózdiń qudireti onyń oı-sanasyn tumshalap tastady. Qaýipti jetkizgen adamnyń senimdi sózderi, bankke tán termınder men sózderdi jetkizýi de senim týdyrǵan. Sondyqtan Jolaman óziniń bankin ashyp, qosa berilgen nusqaýlyqtyń aıtqanyn tolyq istep, bar aqshasyn «qaýipsiz» esepshotqa aýdara salyp, bir «ýh» degen edi.
Biraq áldeneden júregi dúrsildep, mazasy kete bergen soń jańa esepshotyndaǵy depozıtiniń amandyǵyn bilip qoıaıynshy dep banktegi shotyn ashsa... ondaǵy soma «0»-di kórsetip tur. Túsken aqshany bes mınýt buryn ǵana bireý tolyǵymen basqa jaqqa aýdaryp jiberipti... Densaýlyǵy qansha myqty bolsa da, Jókeń sol jerde talyp qala jazdaıdy. Tek úıden shyqqan áıeliniń kómegimen ǵana esin jınap, polısııaǵa aryz berýge keledi.
Soltústik Qazaqstan oblysy PD bastyǵynyń orynbasary Rýslan Nazarov mundaı oqıǵalardyń sońǵy kezderi tipti jıilep ketkenin jetkizdi. Sońǵy jeti aıda ǵana dál osyndaı shaǵymnyń 129-y tirkelgen eken. «Mundaı qylmystardy ashý óte qıyn, óıtkeni alaıaqtar kóbinese eldiń basqa aımaqtarynda otyrady. Tipti basqa memleketterde otyrýy da múmkin. Biz tek qylmystyń aldyn alýdy turǵyndarǵa únemi aıtyp otyramyz. Eshqashan «bank qyzmetkerimin» dep habarlasqan adamnyń sózine senbeńizder. Eger banktegi shotyńyzda bir kúdik bolsa, ony dereý kelip tekserińizder. Qupııa derekterińizdi eshkimge bermeńizder degen eskertýlerdi bankterdiń esigine, bankomattarǵa ilip qoıdyq jáne BAQ arqyly habarlaýdamyz», dedi ol.
Degenmen osyndaı alaıaqtardyń keıbiri ustalyp ta jatyr. Polısııa olardyń qylmys jasaý tarıhyn jınaqtap, birizdendirip, shyǵý tegin anyqtasa ǵoı. Bizdińshe, mundaı alaıaqtyqty, negizinen, buryn bankte istep, ondaǵy termınderdi, sóıleý mánerlerin jaqsy biletin adamdar ǵana jasaıdy. Sondyqtan qazir de, buryn da bankte istegen jáne isteıtin adamdardyń daýys yrǵaǵyn, dybysyn jazyp, saqtaıtyn arnaýly kartoteka jasaǵan durys bolar edi. Eger ondaılar kompıýterde tursa, japa shegýshi olardy estigende kim ekenin kórsetip berer edi.
Buryn qylmyskerlerdiń fotolary, saýsaqtarynyń tańbalary osylaı saqtalatyn. Endi bank qyzmetkerleriniń dybystary kompıýterde osylaı saqtalsa durys bolar edi. О́ıtkeni alaıaq qylmyskerler alystan emes, naq ózimizdiń bankte buryn nemese qazir isteıtin qyzmetkerlerdiń ózderiniń arasynan shyǵady. Sonda polısııa da alaıaqty alystan izdep sabylmaı, jaqynnan tabar edi. Árıne, alaıaq óziniń qurbandyǵyna óz daýsyn kórsetpeı, sybaılasyn sóılestirýi múmkin. Biraq ondaılardyń daýysy báribir sezik týdyrmaı qoımaıdy... Sondyqtan da kúnnen-kúnge ulǵaıyp bara jatqan bankilermen baılanysty alaıaqtyqty quryqtaý úshin polısııa qyzmeti «Zamanyń túlki bolsa – tazy bop shal» degendeı osyndaı jańa ádister tapqany jón.
Árıne, adamnyń quqyǵyna qol suǵý dep mundaıǵa kóptegen adam qarsy bolýy múmkin, biraq qaýipsizdik úshin halyqtyń ózine paıdaly bolatynyn túsinse, eshkim qarsy bola qoımas.
Soltústik Qazaqstan oblysy