Atyraýda alǵash ret halyqaralyq shahmat festıvali ótti. Segiz kúnge sozylǵan sharshy taqtadaǵy tartysty saıysqa Qazaqstan, AQSh, Nıderland, Lıtva, Ýkraına, О́zbekstan, Tájikstan, Belarýs, Reseı sııaqty álemniń 9 elinen 300-ge jýyq oıynshy qatysty. Festıvaldiń jalpy júlde qory 13 257 500 teńgeni qurady.
Qazaqtyń atyn jahanǵa tanytqan tanymal shahmatshy, álemniń birneshe dúrkin chempıony, IýNISEF-tiń izgi nıet elshisi Dınara Sádýaqasovanyń aıtýynsha, osy saıysqa qatysqan jastar keleshekte el namysyn abyroımen qorǵaıtyn ataqty grossmeısterler qatarynan tabylýy múmkin. О́ıtkeni olar Atyrau Chess Festival sekildi týrnırlerde jıi baq synaıdy.
– Sharshy taqtadaǵy tartysty oıynnyń jeńimpazy bolý ońaı emes. Sebebi bul – oılylar oıyny. Shahmatshy qatelespeýi kerek. Atyraýdaǵy týrnır shahmatshylardyń sheberligin shyńdady, – deıdi Dınara Sádýaqasova.
Oblys ákimi Serik Shápkenovtiń málim etýinshe, endi Atyrau Chess Festival halyqaralyq festıvalin jyl saıyn ótkizýge sheshim qabyldandy. О́ıtkeni mundaı týrnır jastardy oıshyldyqqa, zııalylyqqa, salamatty ómir saltyn ustanýǵa umtyldyrady.
Halyqaralyq festıval aıasynda 2-razrıadtan tómen emes sportshylar úshin Atyrau Open, 3-razrıadtan tómen emes, 2006 jyly týǵan jáne odan kishi sportshylar qatysqan Atyrau Juniors, sondaı-aq 3-razrıady bar sportshylar arasynda blıs-týrnır ótti. Úsh týrnırdiń qorytyndysymen 80-nen astam qatysýshy medal, dıplom ne qarjylaı syılyqtyń ıegeri atandy. Jeńimpazdar men júldegerlerdiń arasynda halyqaralyq grossmeısterler, jańadan bastaǵan jas sportshylar men ardagerler bar.
Oıynshylardyń quramy jaǵynan Atyrau Open týrnıri basty nazarda boldy. О́ıtkeni sharshy taqtadaǵy jeńis úshin tanymal kásipqoılar – halyqaralyq grossmeısterler, tanymal sheberler men shahmatshylar tartysty oıyn ókizdi.
Atyrau Chess Festival týrnıriniń qorytyndysymen áıelder arasynda Ekaterına Borısova birinshi oryndy ıelendi. Al Nazerke Nurǵalı ekinshi, Alýa Nurlanova úshinshi orynǵa ıe boldy. Erler arasynan birinshi oryn alǵan Tımýr Gareev jeńis tuǵyrynan kórindi. Arsenıı Nesterovke ekinshi oryn buıyrdy. Sergeı Tıvıakov úshinshi oryndy mise tutty. Atyrau Open týrnırinde ardagerler arasynda Ázıdolla Hamıev, Eseı Husaıynov pen Aıtqalı Izbasarov jeńimpaz atandy. Blıs-týrnırde Pavel Pankratov, Farrýh Amonatov pen Sergeı Tıvıakov jeńiske jetti. Atyrau Juniors týrnıriniń qorytyndysymen 8, 10, 12 jáne 14 jasqa deıingi jas sanattary boıynsha júldeli oryndar berildi.
Sharshy taqtadaǵy tartysta ese jibermeıtin shahmatshylar dodasynda úlkender de, jastar da, tipti 4 jastaǵy balaqaı da baq synady. Máselen, Bókenbaı Aǵashanyń jasy 81-de bolsa, Tappatqan Qabysheva 64 jastan asqan. Oblys ákimi egde jastaǵy ekeýine de 250 myń teńgeden qarjylaı syıaqy tabystady. Eki qatysýshy – Batyrhan Sherýen men Ámiráli Abzal Qazaqstan-Brıtan tehnıkalyq ýnıversıtetiniń bilim grant túrindegi arnaıy syılyqty ıelendi. Festıvaldiń eń jas qatysýshysy 4 jastaǵy Abdýl-Málik Qaıratqa Atyraý qalasynyń ákimi 200 000 teńgeniń sertıfıkatyn tabys etti.
– Ulym Abdýl-Málik jarty jyldan beri aptasyna eki ret shahmat seksııasyna baryp júr. Buǵan qosa robot tehnıkasy úıirmesi men basseınge, hıp-hop pen aǵylshyn tili kýrsyna barady. Kún saıyn keshki mezgilde ákesimen shahmat oınaýdy ádetke aınaldyrdy. Shahmat týrnırlerine qatysyp, óz tustastary ǵana emes, eresek jastaǵy qarsylastaryn da utyp júr. Halyqaralyq festıvalde úsh partııa jeńiske jetti, – deıdi tórt jasar shahmatshynyń anasy Dıana Erjanova.
Úsh týrnır kezinde oıyn seanstarymen bir mezgilde ashyq sheberlik sabaqtary ótti. Festıval baǵdarlamasyna sáıkes halyqaralyq arbıtrlerdiń birinshi semınarynda qatysýshylar emtıhan tapsyrdy. Emtıhannan joǵary upaı alǵandarǵa FIDE tóreshisi ataǵyn berý kózdeldi. Semınardyń 6 qatysýshysy qajetti upaı sanyn jınady.
Atyraý oblysy