ATYRAÝ. 12 mamyr. Búgin Atyraýda qazaqtyń belgili óner zertteýshisi, kompozıtor Ilıa Jaqanov beıneleý óneri, syzý mamandyǵy boıynsha dıplomdyq jumysyn qorǵady. Bul týraly egemen.kz tilshisi habarlady.
Buǵan deıin jýrnalıstik, jazýshylyq, kompozıtorlyq qyrymen keńinen tanylǵan Qazaqstannyń eńbek sińirgen qaıratkeri Ilıa Jaqanov bala kezinen sýret salyp keledi. О́ziniń aıtýynsha, qazaq dalasynyń tańǵajaıyp keremetterin ánmen jetkize almaǵan kezde qolyna qylqalam alyp, maıly boıaýmen sýret salady. Onyń janartaýdaı býyrqanǵan sýretkerligin baıqaǵan jergilikti qylqalam sheberleri H.Dosmuhamedov atyndaǵy Atyraý memlekettik ýnıversıtetinen kásibı bilim alýǵa usynys jasaǵan. Sóıtip, 2012 jyly jergilikti bilim ordasyna eki jyldyq qysqartylǵan kýrsqa oqýǵa qabyldanǵan.
Búgin qazaqtyń qabyrǵaly qalamgeri, tanymal kompozıtor Ilıa Jaqanov H.Dosmuhamedov atyndaǵy Atyraý memlekettik ýnıversıtetiniń memlekettik emtıhan komıssııasynyń músheleri kompozıtordyń «Jeruıyq» taqyrybyndaǵy dıplomdyq jumysyn óte joǵary baǵalady. Dıplomdyq jumysty qorǵaý Sh.Sarıev atyndaǵy kórkem sýret jáne qoldanbaly óner murajaıynda ótti. «Dıplomdyq jumysyma Altaıdan Atyraýǵa deıin sozylyp jatqan qazaq dalasynyń sulý kórinisterin arqaý ettim. Birinshi sýrette Altaı taýynyń tańǵajaıyby, ekinshi sýretimde Saryarqanyń keń dalasy kórinis tapty. Úshinshi sýrette Aqjaıyqtyń keremetin keń aýqymda baıandadym» dedi Ilıa Jaqanov.
Bir atap óterligi, qazaqtyń tanymal tulǵasynyń dıplomdyq jumysyn qorǵaýyna ýnıversıtettiń oqytýshy-professorlary, stýdentteri, sonymen birge jurtshylyq ókilderi de qatysty. Jurtshylyq nazaryna I.Jaqanovtyń dıplomdyq jumysymen birge buryn salǵan sýretteri de qoıyldy. Eske sala keteıik, jazýshy, kompozıtor, ónertanýshy tulǵa 6 mamyrda 78 jasqa toldy.
Joldasbek Shópeǵul.
Derekkóz: egemen.kz.
Foto: egemen.kz.