О́SKEMEN. 12 mamyr. Búgin tańerteń óskemendikter jumysqa jete almaı, aıaldamalarda avtobýstardy saǵattap kútip qaldy. Buǵan bir tasymaldaýshy kompanııanyń óz kólikterin marshrýtqa shyǵarmaı qoıǵany sebep boldy. Bul týraly Egemen.kz tilshisi habarlady.
Osynyń saldarynan tańerteń jolaýshylardyń qatary sıregen kólikter salonyna syımaı qalý oqıǵalary týyndady. Sońynan belgili bolǵandaı, qaladaǵy iri jolaýshy tasymaldaýshy «Rost» JShS tasymaldaý baǵyttaryna 200 dana kólikti shyǵarmaı, tek jumysqa barý jáne qaıtý ýaqyttarynda ǵana qyzmet kórsetetinin málimdegen eken. Ol tańǵy 6.00 men 10.00 jáne 15.00 pen 21.00 saǵattar aralyǵynda ǵana qyzmet kórsetýdi uıǵaryp, osyǵan baılanysty talap-tilekterin hatyn qala ákimdigine joldapty.
Qala basshylyǵy óz kezeginde atalǵan hatty kompanııa áreketine quqyqtyq baǵa berý úshin prokýratýraǵa joldady. Al О́skemen qalasy ákiminiń orynbasary Maqsut Isahov oblystyq aqparat ortalyǵynda brıfıng ótkizip, máseleniń sebebi qala ákimdigi men tasymaldaýshy kompanııanyń jolaqy qunyn 75 teńgege kóterý tóńireginde mámilege kele almaı jatqanynda ekenin aıtty.
Eske sala keteıik, buǵan deıin de jolaqy qunyn kóterýdi talap etken jolaýshy tasymaldaýshylardyń ótinishin qala bıligi qanaǵattandyrmaǵan edi.
«Biz avtotasymaldaýshylardyń jaǵdaıyn jáne olardyń tarıfti kóterý talabynyń negizin jaqsy túsinemiz. Degenmen, biz qala turǵyndarynyń da jaǵdaıyn oılaımyz. Kóptegen otbasylardyń músheleri qoǵamdyq kólikti paıdalanady. Olarǵa baǵanyń kóterilýi aýyr tıedi», – dedi qala ákiminiń orynbasary.
Qazirgi kezde qala basshylyǵy men «Rost» JShS ókilderi arasynda kelissóz júrip jatyr. Taǵy birshama ýaqytqa baǵany kótermeý jóninde kompanııaǵa birneshe usynystar ázirlendi. Erteń barlyq avtobýstar óz baǵyttaryna qyzmet kórsetýge shyǵady dep kútilýde.
Al jolaqy qunyn ózgertý týraly sheshimdi qalalyq máslıhat depýtattary mamyr aıyndaǵy otyrysta qabyldaıtyn bolady.
Dýman Anash.
Derekkóz: Egemen.kz.
Foto: Egemen.kz, Altaynews.kz.