Álııany úlgi etip ósken qyz

Ekinshi dúnıejúzilik soǵysta ultymyzdyń mereıin kóterip, dańqy jaıylǵan qaharman qyzdarymyz – bizge máńgi maqtan. Álııa men Mánshúk, Hıýazdyń sińlileri búgin táýelsiz Qazaqstan áskeri qatarynda sapta tur. Júk salǵan dorbasyn arqalap, polıgondarda or qazyp jattyǵyp júrgen qurlyq áskerleri sapyndaǵy qyzdar da, kók teńiz aıdynyndaǵy asaý tolqyndardy aýyzdyqtap, teńiz jıeginen atqan araıly tańdy kemelerde qarsy alyp júrgen qyzdar da bar. El tynyshtyǵyn kúzetý jolyndaǵy qıyn da qatal qyzmetti múltiksiz atqaryp júrgenderdiń biri – Qazaqstan Respýblıkasy Qarýly Kúshteri Áskerı-teńiz kúshteriniń 21814-áskerı bólimi mına-traldyq korabli komandıriniń tárbıe jáne ıdeologııa jumystary jónindegi orynbasary, kapıtan Elvıra Halyqbaeva. Reti kelip Elvıra Seıithanqyzyn áńgimege tartqan edik. – Elvıra, keshege deıin mamandyq túrlerin erge, áıelge laıyq dep bólip qaraǵan uǵym boldy. Ásirese, áskerı forma kıip, tynymsyz jattyǵý ús­tinde júretin, temirdeı tártip pen tegeýrindi talap sheńberinen shyqpaý qatań qadaǵalanatyn Otan qorǵaýdy, áskerı qyzmetti erlerdiń enshisi dedik. Basqany bylaı qoıǵanda, ekinshi dúnıejúzilik soǵystaǵy qyzdardyń eren erliginiń ózi bul túsinikti túbirimen ózgertip jibere alǵan joq. Al búgin táýelsiz elimizdiń kók baıraǵy astynda elimizdiń tynyshtyǵyn kúzetip sizder júrsizder... – Bólip qaraý qyzdardyń náziktigine baılanysty, áıtse de qyzdardyń namysy, sezimi men senimi, tabandylyǵy erlerden kem túspeıdi. Ásirese, qazaq tarıhynda sózine kúlli eldi uıytqan, isine jurty súısingen analarymyz, apalarymyz az bolmaǵan ǵoı. Qıyn kezderde ań aýlap, bir aýyldy asyraǵan atqa shapsa ozatyn shabandoz, atsa ań balasy qutylmaıtyn mergen qyzdar týraly úlkenderden estip óstik. Olar qashanda el basqarǵan, tizgin ustaǵan erlerdiń senimdi serigi, kerekti jerinde keńesetin aqylshysy da bolǵan. Búgingi qazaq qyzdary, sondaı-aq, keń-baıtaq jerimizdi meken etýshi ózge de otandas qarakózder kók baıraq astynan tabylsaq, egemen elimizdi nyǵaıtýǵa aza­mattyq úlesimizdi qossaq degen sezim ǵoı. – Áskerı ómirdi tańdaýyńyzdyń sebebi túsinikti boldy. Qıyndyqqa shyńdala túsken shyǵarsyz? – Men 1973 jyly Aqtóbe oblysynda týyp-óstim. Zań salasynda joǵary bilim alǵan soń, bala kútimimen úıde otyrdym. Jumys týraly oılaǵanda, ózime bala kezden arman bolǵan, kóp jyldar qııalymdy álpeshtegen áskerı salany tańdaýǵa bel býdym. Keńes Odaǵynyń Batyry Álııa Moldaǵulova meniń bala kezden maqtanyshym boldy. Osy maqsat, qyzyǵýshylyq meni aqyry 2002 jyly «Batys» áskerı okrýgine qarasty 51051-áskerı bólimine alyp keldi. Kelisimshart negizinde qatardaǵy jaýynger bolyp qyzmetke qabyldandym. Arada ótken 12 jyl ýaqyt, rasynda shyńdalý mektebi boldy. Men oqýshy kezimnen sportpen aınalystym, jazǵy sport túrlerinen Qazaqstan qurama komandasy sapynda Reseıge shyqqan kezderim de bolǵan. Sportty serik etýim maǵan kóp kómek berdi, jaýyngerlik jattyǵýlardan asa qatty qınalǵan kezim bolǵan joq. Jan dúnıeńmen qalaǵan qyzmettiń, tańdaǵan mamandyqtyń qıyndyǵynan da rahat alýǵa bolady dep oılaımyn. Taǵy bir aıtarym, áskerı qyzmettiń qıyndyǵyna tózbedim dep álsizdik tanytyp, jumystan qol úzgen qazaq qyzdaryn kórgen joqpyn. Osyǵan rıza bolamyn. – Tárbıe jáne ıdeologııa jumys­tary – áskerıler arasyndaǵy mańyzdy taqyryp. Bul baǵyttaǵy qolǵa alǵan ju­mys­taryńyz aýqymdy bolar? – Qazaqstan – dostyq pen tatýlyqty aldyńǵy orynǵa qoıǵan, jarqyn bo­lashaqqa osy qundylyqtarmen qol jet­kizýdi mejelegen memleket. Elbasy Nursultan Nazarbaev «Qazaqstan-2050» Strategııalyq baǵdarlamasynda barsha qazaqstandyqtardyń aldyna elimizdi álemniń damyǵan 30 eliniń qataryna jetkizý mindetin qoıyp otyr. Sondaı-aq, «Qazaqstan – 2050: bir maqsat, bir múdde, bir bolashaq» Joldaýynyń da siltegen baǵyty – osy ozyq otyzdyq sanatynan óz ornymyzdy alý. Biz bul maqsatqa bir­lik, tynyshtyq arqyly jetemiz. Elbasy júrgizip otyrǵan memlekettik saıasatty qoldap, onyń tabysty oryndalýy jolynda eńbek etýdemiz. Men qazir elimizdiń Áskerı-Teńiz kúshteriniń Aqtaý qalasyndaǵy Áskerı-teńiz bazasynda qyzmettemin. Memleket basshysynyń jyl saıynǵy Joldaýlaryn, mem­lekettik baǵdarlamalarynyń maqsat-mindetin ofıserlerdiń arasynda, sondaı-aq matros­tar arasynda nasıhattaý jumystaryn turaqty júr­gizip kelemiz. Áskerılerdiń eljandy bolýy barynsha mańyzdy dep esep­teımin, jumysymyzdy sol baǵyt­ta úılestirip kelemiz. Memlekettiń, eli­mizdiń Qarýly Kúshteriniń, Áskerı-teńiz kúshteri basshylarynyń nazar aýdarýy nátıjesinde qazir áskerılerdiń ma­terıaldyq jaǵdaıy biraz jaqsardy. Alań­syz jumys jasaýǵa tolyq múm­kindik bar. Áńgimelesken Gúlaıym ShYNTEMIRQYZY, «Egemen Qazaqstan». Mańǵystaý oblysy. Sýretti túsirgen Talant QUSAIYN.