Qazaqstan Google-den kontentti óshirip tastaýǵa ótinish berý boıynsha álemdik reıtıngte úshinshi oryndy ıelenedi. Internet Freedom quqyq qorǵaý uıymynyń Aqparat jáne qoǵamdyq damý mınıstrliginen alǵan aqparaty boıynsha 2014-2022 jyldar aralyǵynda Qazaqstanda 95 myńnan astam ınternet-resýrs buǵattalǵan.
Ranking málimeti boıynsha buǵattaýdyń eń kóp taralǵan sebebi – qatygezdik pen zorlyq-zombylyq, sýısıd jáne pornografııa kýltin nasıhattaý. Bul – búkil buǵattaýdyń 42 paıyzy. Ekinshi oryndy 33 paıyzben terrorızm jáne dinı ekstremızm ıdeıasyn nasıhattaý tur. Sonymen qatar bizdiń elimiz Google-de jarııalanǵan kontentti óshirip tastaýǵa ótinish berý boıynsha Indonezııa men Reseıden keıingi úshinshi orynda eken.
2011 jyldan beri Google kontentti óshirýge berilgen ótinishterdi tirkep, bul týraly aqparattardy habarlaı bastaǵan. Qazaqstan halyqaralyq kompanııaǵa 532 ret ótinish bildirgen. Bul ótinimderde el bıligi kompanııanyń túrli servısi, sonyń ishinde YouTube pen veb-izdeý júıesindegi 260 myńnan astam kontentti óshirip tastaýdy suraǵan.
Al Google óz tártibi boıynsha materıaldy óshirýden túrli sebepter negizinde bas tartýy múmkin: «Keıbir ótinimderde naqty neni óshirý týraly aqparat bolmaıdy. Basqa jaǵdaılarda avtordyń óz betinshe kontentti óshirgeni belgili bolady».
Sonymen qatar barlyq kelip túsetin sot sheshimi naqty áreketterdi talap etpeıdi. Kompanııa stastıkasyna sáıkes, Google bılik ótinimderin sırek oryndaıdy. 2021 jyldyń ekinshi jartysynda kompanııa Qazaqstan bıligi ótinishiniń 94,9 paıyzyn oryndaýdan bas tartqan.
Qazaqstannyń mazmundy alyp tastaý týraly suraý salýlarynyń ekinshi eń kóp taraǵan sebebi – Úkimetti synaý boldy (sońǵy 10 jylda 21 paıyz). Sońǵy eki jyl bul parametr boıynsha rekordty boldy: 2020 jyly el Úkimetin synaýǵa baılanysty Qazaqstan Google-ge 44 ret, 2021 jyly 47 ret ótinim jibergen.