Qazaqstannan shyqqan sýretshilerdiń reseılik kórmesi

Qostanaı qalasyndaǵy kórkemsýret galereıasynda erekshe kórme ótti. Osydan otyz jyl buryn Arqalyq pedagogıka ınstıtýtynyń kórkemsýret fakýltetin bitirip, keıin Reseıde qyzmet istegen bir top sýretshiler óz shyǵarmalaryn qostanaılyqtar naza­ryna usyndy. Kórmeni uıymdastyrýǵa ınstıtýt túlek­teri men sol kezdegi olarǵa sabaq bergen ustaz­dar­dyń bastamasy sebep boldy. Kóp jyldar kezdes­pegen túlekter kórmege óz shyǵarmalaryn qoıyp, dos­­tarmen kezdesý úshin Reseıdiń Nıjnevartovsk qa­la­synan, Bashqurtstannan, Qazaqstannyń ár shal­ǵaıynan Qostanaıǵa keldi. Galereıanyń eki zalyna birdeı ilingen ár janrda jazylǵan shyǵarmalardan, gobelenderden, músinderden tarıhı kórshi eki eldiń, orys ormany men qazaq dalasynyń sıpatyn kór­gendeı bolasyń. Instıtýt túlekteri arasynda Nıj­­nevartovskiden kelgen Ramazan Shaıqulovtyń, Ra­gıza Shaıqulovanyń, Iýrıı Bychkovtyń, Erik Hu­saıynovtyń jáne bashqurtstandyq Vıtalıı Sha­pova­lovtyń shyǵarmalary Reseıge tanymal bolyp qalǵan. – Kórmege qatysýshy sýretshiler negizinen Reseıdiń Nıjnevartovsk qalasynan keldi. Olar son­daǵy ýnıversıtette qyzmet isteıdi jáne shyǵar­mashylyqpen aınalysady. О́ner barda eki el, eki halyq arasyndaǵy baılanys úzilmek emes. Biz­diń túlekter osy kórme arqyly kórshi elder ara­syndaǵy úzilmeıtin altyn tin sekildi rýhanı baı­lanystyń máńgi jasaıtynyn dáleldep otyr. Olar­dyń sýretterinen Sibirdiń, hakas halqynyń rýha­nı dúnıesin, tabıǵatyn kóremiz. Bizdiń túlekter Re­seıde tursa da, olardyń shyǵarmashylyǵynan dala­nyń, týǵan jerdiń beınesin umytpaǵanyn baıqap qalasyz. Mysaly, Ýfada turatyn Vıtalıı Shapovalov shyǵarmasynda negizinen qoshqar múıizge kóbirek súıenedi. Bul sýretshiniń týǵan jerge degen saǵynyshyn qylqalam arqyly jetkizýi jáne tarıh tereńindegi túbimizdiń bir ekenin meńzeıdi, – deıdi osy túlekterdi tárbıelegen belgili ónertanýshy Marııa Jumaǵulova. Kórmeni qostanaılyqtar birneshe kún tamasha­lady. Al Arqalyq pedagogıka ınstıtýtynan qanat­tanyp ushqan reseılik sýretshiler men jergilikti qylqalam sheberleri shyǵarmashylyq kezdesý ótkizip, ózara oı bólisti. Názıra JÁRIMBETOVA, «Egemen Qazaqstan». QOSTANAI.