El Prezıdenti Qasym-Jomart Toqaevtyń kezekti Joldaýyn jurtshylyqpen birge tyńdaǵan Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ujymy jańa Qazaqstannyń bolashaǵy jarqyn bolaryna senimdi.
Ýnıversıtet basshylyǵy jáne professor-oqytýshylar quramy men qyzmetkerleri, bilim alýshylar Memleket basshysynyń búgingi Joldaýyn ujym bolyp tyńdady. Mańyzdy salalar túgeldeı derlik qamtylǵan saıası qujatty talqylaǵan ujym Joldaýdy qoldaıtyndaryn jetkizdi. Ásirese, bilim salasyna, jastarǵa qatysty aıtylǵan máseleler joǵary oqý orny ustazdarynyń kóńilinen shyqty. Ýnıversıtettiń basqarma tóraǵasy-rektor Asqar Nametov bıylǵy Joldaýdyń dál ýaqytynda jarııalanǵanyna senimdi.
– Búgin – Bilim kúni. Bizdiń basty maqsatymyz – sapaly bilim berý, sapaly kadrlar daıarlaý. Osy rette jastardyń joǵary bilim alýyna jaǵdaı jasaý, bilikti maman bolýyna yqpal etý, jumyspen qamtý baǵytynda jumystanyp kelemiz. Memleket basshysynyń Joldaýynda da bul máseleler nazardan tys qalmady. Buǵan deıin de bizdiń aldymyzǵa naqty maqsat-mindetter qoıylǵan edi. Nátıjesinde biz jańa oqý jylyndaǵy jumys josparymyzdy júıelep, sharýashylyqtarmen, kásipkerlermen, bıznes nysandarymen birige otyryp, joǵary bilimdi kásibı mamandar daıarlaýdy iske asyratyn bolamyz, – dedi Asqar Myrzahmetuly.
Jáńgir han ýnıversıtetiniń stýdentteri Joldaýdyń jastarǵa qatysty tustaryn qýana qabyldady.
– Prezıdent Joldaýyn ýnıversıtet qabyrǵasynda ustazdarymyzben birge tyńdadyq. Memleket basshysy mańyzdy salalardy nazardan tys qaldyrmaı, eldegi barlyq jaǵdaıǵa toqtalyp ótti. Sonyń ishinde Prezıdentimizdiń jastar máselelesine de basymdyq berip, memlekettiń olardy ár kez qoldaıtynyn aıtqany qýantty. Bilim berý granttaryn bólý, jumyspen qamtý baǵytyndaǵy is-sharalar jastarǵa serpilis bergeni anyq. Jalpy bul mańyzdy qujatta kórsetilgen barlyq maqsat-mindetter elimizdiń bolashaǵyna, damý jolyna oń áserin tıgizedi degen oıdamyn, – deıdi 4-kýrs stýdenti Omarhan Nııaz.