Úsh aıǵa sozylǵan demalystan soń mektebi, súıikti ustazdary hám synyptastarymen saǵynysyp qaýyshqan baldyrǵandardyń alaburtqan sezimin sirá oqýshy bolǵan kez kelgen jan jaqsy túsinedi. Áıtse de bala kóńili úshin osy bir erekshe sátti baqytqa ulastyrýǵa, ókinishke qaraı, kez kelgen otbasynyń materıaldyq jaǵdaıy mursat bere bermeıdi. О́ıtkeni mektepke qamdaný – qýanyshty ǵana emes, kúrdeli de shyǵyndy kezeń. Osyny eskergen Astana Opera teatrynyń ujymy 1 qyrkúıek – Bilim kúnine oraılastyrylǵan qaıyrymdylyq aksııasy aıasynda elordanyń az qamtylǵan jáne kópbalaly otbasylaryna tosyn syı jasady.
– «Qýantsań – balany qýant» deıdi. Balalar jylynda óskeleń urpaqqa erekshe nazar aýdaryp otyrmyz. Balany mektepke ázirleý – kez kelgen otbasy úshin mańyzdy oqıǵa. О́kinishke qaraı, kópbalaly jáne az qamtylǵan otbasylar úshin bul aýyrtpalyq týdyratyn is-shara. Osy jaǵdaıdy sanaly túrde uǵynǵan teatrymyzdyń eriktileri saýaby mol is-sharadan qalys qalmaı, mektepke qajetti keńse jáne basqa taýarlardan, sondaı-aq muqtaj jandarǵa arnalǵan azyq-túlik jıyntyǵynan turatyn arnaıy bokstar jınaqtady, degen Astana Opera dırektorynyń orynbasary Aıjan Qurmanǵalıeva mundaı qoldaýdyń qanshalyqty mańyzdy ekenin atap ótti: – Oqýshyny mektepke daıarlaýdyń qanshalyqty jaýapty jumys ekenin jaqsy túsinemiz. Sondyqtan da ómirlik qıyndyqtar kórip júrgen adamdarǵa shynymen janymyz ashıdy jáne jańa oqý jylyna daıyndyqty barynsha jeńildetýge tyrystyq. Osy oraıda barlyq áriptesterimizdi jaǵdaıy tómen otbasylarǵa kómek kórsetýge shaqyramyz.
Astana Operanyń syılyq jıyntyqtaryna eń qajetti mektep jabdyqtary, atap aıtsaq, arqa qorjyndary, dápterler, qalamdar, qaryndashtar, syzǵyshtar, qalamsaýyttar, boıaýlar, ermeksaz ben ár balaǵa qajetti basqa da zattar engen. Teatr eriktileri arnaıy aralap júrip baqytty oqýshylarǵa syılyqtardy óz qolymen tabystady.
– Bizdi qaıyrymdylyq jasaý shabyttandyrady, sebebi biz adamdarǵa kómektesý múmkindigine ıe bolǵanymyz úshin shyn qýanamyz, olardyń emosııalaryn kóremiz. Ásirese syılyqtardy qyzyǵa kórip jatqan balalardyń kúlimdegen júzin kórý bir baqyt, dep atap ótti eriktiler.
Qaıyrymdylyq qyzmeti teatr ómiriniń ajyramas bóligine aınalǵanyn jáne turaqty túrde uıymdastyrylyp turatynyn atap ótken jón. Ol belgili bir baǵytpen nemese formamen shektelmeıdi. Astana Opera qyzmetkerleriniń nazarynda turǵyndardyń túrli toptary qamtylǵan. Az qamtylǵan jáne kópbalaly otbasylar, jalǵyz basty analar, múmkindigi shekteýli jandar, ata-anasynyń qamqorlyǵynsyz qalǵan balalar búginde Astana Opera teatrynyń qamqorlyǵyna bólenip keledi. Máselen, Jeńis kúni qarsańynda eriktiler elordalyq ardagerlerdiń úıinde qonaqta bolsa, al Dúnıejúzilik aýtızm máselesi týraly aqparatty taratý kúni Astana Opera-da aýtıstik spektri buzylǵan balalar qatysqan qaıyrymdylyq konserti ótti. Kórermendi biregeı ónerimen ǵana emes, sheksiz meıirim-qamqorlyǵymen de qýanyshqa bólep júrgen uıymshyl ujymnyń ónegeli isi kópke úlgi.