Fýtboldan Qazaqstan kýbogy jolyndaǵy jarystyń shırek fınaldyq oıyndary Almaty, Taraz, Qyzylorda jáne Nur-Sultan qalalarynda ótti.
«Qaırat» Ortalyq stadıonda Oraldyń «Aqjaıyǵyn» qabyldady. Esep 78-mınýtta ǵana ashyldy. Aıyp dobyn múltiksiz oryndaǵan Sergeı Keıler alań ıelerin alǵa shyǵardy. Alaıda bul esepti almatylyqtar uzaq ustap tura almady. 87-mınýtta Vıktor Vasın avtogoldyń avtory atansa, 90-mınýtta Oralhan О́mirtaev qonaqtarǵa jeńis syılady – 1:2. «Taraz» ben «Shahterdiń» arasyndaǵy match teń aıaqtaldy – 1:1. Desek te penaltı soǵý barysynda «Tarazdyń» baǵy jandy – 4:2. «Qaısar» men «Ordabasy» arasyndaǵy kezdesýde dál sondaı «ssenarıımen» órbip, negizgi jáne qosymsha ýaqytta eki komanda da bir-bir goldan soqty. «Fýtbol lotereıasynda» shymkenttikterdiń asyǵy alshysynan tústi – 4:1. «Astana» men «Maqtaaraldyń» da fýtbolshylary uzaq tartysty. Báseke taǵdyryn 90-mınýtta elordalyqtardyń sapyndaǵy fransııalyq legıoner Kılan Lebonnyń soqqan jalǵyz goly sheshti – 1:0.
Osylaısha, «Aqjaıyq», «Taraz», «Ordabasy» jáne «Astana» jartylaı fınalǵa joldama aldy. Bul mejedegi oıyndar 19 qazanda ótse, el kýbogynyń ıegeri 12 qarashada anyqtalady.