Indýstrııa jáne ınfraqurylymdyq damý mınıstrliginiń «Ashyq saǵat alańynda» elimizdegi avtokólik joldarynyń qysqy maýsymǵa daıyndyǵyna arnalǵan jıyn ótti. «Qazaqavtojol» JShS aqparatyna súıener bolsaq, arnaıy tehnıkalardyń qysqy kezeńge daıyndyǵy 74 paıyzdy quraıdy. Kompanııa basshysy Samat Ǵılymovtyń aıtýynsha, aldaǵy maýsymdyq jumystar úshin jeke tulǵalardan 400 birlik tehnıkany jalǵa alý qajettiligi týyndap otyr.
«Qazirgi tańda bizge 2 836 birlik tehnıka qajet. Al qolymyzda bar-joǵy 1 117 birlik tehnıka bar. Onyń 527-siniń tozyǵy jetken. Jóndeýge de kelmeıdi», dep atap ótti S.Ǵılymov. Sondaı-aq ol eńbekaqy mólsheri 30 paıyzǵa artqanymen bilikti mamandarǵa degen tapshylyq sezilip otyrǵanyn jetkizdi.
«Mınıstrlik tarapynan qoldaýdyń nátıjesinde mekeme jumysshylarynyń jalaqysy kóterildi. Búginde qyzmetkerler jetispeýshiligi birtindep azaıyp keledi. Dese de joǵary bilikti mamandarǵa degen zárýlik týyndaýy múmkin ekenin joqqa shyǵarmaımyz», dedi «Qazaqavtojol» basshysy.
Sonymen qatar basqosýda avtokólik joldarynyń sapasyna da nazar aýdaryldy. Máselen, júk tasymalymen aınalysatyn Kırıll Gadeskıı esimdi azamat Qyzylorda jáne Aqtóbe oblystary shektesetin aımaqtaǵy joldyń sapasy syn kótermeıtinin alǵa tartty.
«Jol jóndeý jumystary júrgiziledi-aq. Alaıda aı ótpeı jol tósenishteri oıylyp, tereńdigi 40 santımetrge jýyqtaıtyn oı-shuńqyrlar paıda bolady. Bul – jol-kólik qozǵalysyna aıtarlyqtaı kedergi keltiredi», deıdi kásipker.
О́z kezeginde Avtomobıl joldary komıtetiniń tóraǵasy «Qyzylorda – Aral – Aqtóbe» baǵytyndaǵy jol torabynyń tozǵandyǵyn rastady.
«Atalǵan aýmaqtaǵy kólik aǵyny óte kóp. Al ondaǵy jol mundaı kólemge shaqtalmaǵan. Qazir kólik aǵynynyń kólemin esepke ala otyryp, aldaǵy ýaqytta bul jol aýmaǵyna birinshi sanat boıynsha qaıta jóndeý jumystary júrgizilmek. Oǵan deıin qysqa merzimdi jóndeý jumystary iske asatyn bolady», deıdi Avtomobıl joldary komıtetiniń tóraǵasy Tólegen Abdýllın.
Stepnogor qalasynyń turǵyny, bloger Artem Sochnev jol jóndeý jumystary barysyndaǵy birqatar máseleni alǵa tartty.
«Qazir Bestóbe aýylynyń mańaıynda asfalt tósenishterin tóseý jumystary júrgizilýde. Oǵan qajetti materıaldy merdiger kompanııa 300 shaqyrym jerden tasymaldaıdy. Júk tıegen kólikterdiń shamadan tys aýyr salmaǵynan beti tegis joldarda oı-shuńqyrlar paıda bolýda. Bir jol jóndelse, endi biri búlinýde», dedi A.Sochnev.
Qazaqstanda jyl saıyn myńdaǵan shaqyrym joldyń jóndelip, tipti qaıta salynatyny belgili. Jaz shyqsa bitti, qala ishindegi joldar da qoparylyp jatady. Árıne, bul sharýanyń bári mıllıardtaǵan teńgesiz bitpeıdi. «Ádildik joly» qoǵamdyq birlestiginiń atqarýshy dırektory Dıdar Smaǵulovtyń aıtýynsha, jyl saıyn jol jóndeý jumystaryna 500-600 mlrd teńge bólinedi. Osynshama mol aqshanyń suraýy bolýǵa tıis.
Aıtpaqshy, jol máselesine jaýapty «QazAvtoJol» men «Kazahavtodor» birigip, birtutas avtojol kompanııasyna aınaldy. Bul týraly shildede Úkimettiń keńeıtilgen otyrysynda Prezıdent Qasym-Jomart Toqaev tapsyrma bergen bolatyn. Mınıstrlik atalǵan eki jol operatoryn biriktirý boıynsha Úkimet qaýlysynyń jobasyn daıyndady. Jobada «QazAvtoJol» Ulttyq kompanııasy «Kazahavtodor» JShS-daǵy memlekettik úlesti satyp alý jolymen ulttyq kompanııany Biryńǵaı avtojol operatory retinde qaıta qurý qarastyryldy.
«Qazir elimizdegi joldyń jaı-kúıin qadaǵalap, qyzmet kórsetetin eki negizgi operator bar. Týrasyn aıtsaq, ekeýi de bir jumysty atqaryp otyr, jumysshylarynyń sany da qajetti shamadan artyq. Soǵan qaramastan, azamattardan kelip jatqan oryndy aryz-shaǵymdar azaıar emes, al joldyń sapasy múlde syn kótermeıdi», degen edi Memleket basshysy Úkimettiń keńeıtilgen otyrysynda.
Qos kompanııanyń birigýi respýblıkalyq mańyzy bar joldardy táýlik boıy kútip ustaýdy qamtamasyz etýde jedel ári naqty sheshim qabyldaýǵa úlken septigin tıgizbek.