Jastardyń bolashaǵyna jaǵdaı jasaý damıtyn eldiń maqsat-múddelerimen tyǵyz baılanysty. Búginde elimizde jastardyń bilim alýy, jumysqa ornalasýyna qatysty týyndap otyrǵan máseleler jetkilikti. Stýdent jastardy jataqhanamen qamtamasyz etý kún tártibinde tur. Ásirese, iri qalalarda jataqhana máselesi áli kúnge sheshimin tappaı keledi, dep jazady Egemen.kz.
Prezıdent Qasym-Jomart Toqaevtyń «Ádiletti memleket. Birtutas Ult. Berekeli qoǵam» atty Joldaýynda aıtylǵan jastarǵa jaǵdaı jasaý, olardyń sapaly bilim alyp, turaqty jumyspen qamtylýy, tómen paıyzben nesıe alýy sııaqty mindet-usynystar aldaǵy ýaqytta júzege asatyn bolsa, qoǵamnyń jastar bóligi birqatar jeńildikke ıe bolar edi. Osy turǵydan qarastyrǵanda, elimizde endi jolǵa qoıylyp kele jatqan memleket pen kásipkerlik seriktestigin ary qaraı jalǵastyryp, qurylys kompanııalary úshin tıimdi usynystardy, salyqtyq jeńildikterdi qarastyrý múmkindikterin kóbeıtken abzal.
Memleket basshysy Joldaýda jataqhana máselesi memleket moınyndaǵy jaýapkershilik retinde qala beretinin aıtty. Osy oraıda jeke menshik joǵary oqý oryndaryndaǵy jataqhana máselesine memleket tarapynan qoldaý jasalatyndyǵy da oryndy. Búginde jastardyń aldynda úlken mindetter tur. Olar óz bilimin ary qaraı el kelesheginiń damýyna arnap, ekonomıkanyń qaı salasynda bolmasyn eńbek etýdi qalaıdy. Prezıdenttiń balalarǵa 18 jasqa tolǵanǵa deıin arnaıy shot ashyp, onyń aldaǵy ýaqytta sapaly bilim alýyna múmkindik jasaýy týraly usynysy bolashaqqa jasalǵan kapıtal, bul kóptegen qoldaýǵa muqtaj otbasylar úshin úlken jeńildik. Prezıdent Joldaýynda bes baǵdar boıynsha kótergen máseleniń barlyǵy da jurtshylyqtyń kókeıinde sheshimin tappaı júrgen kóptegen túıtkildi jaıttardy iske asyrýǵa múmkindik beredi.
Rýslan AHMAǴANBETOV, ál-Farabı atyndaǵy QazUÝ, saıasattanýshy, PhD ALMATY