Arshaly aýdanyndaǵy keıbir turǵyn úıler «Saryarqa» magıstraldy gaz qubyryna qosyldy, dep habarlaıdy Egemen.kz.
Shyntýaıtynda, qysy qatty óńir úshin jaǵymdy jańalyq. Memleket basshysy Qasym-Jomart Toqaevtyń tapsyrmasyna oraı, ári Úkimettiń qoldaýynyń arqasynda óńirge gaz jetkizildi. Qazir bul jumys kezeń-kezeńimen atqarylýda.
«Birinshi kezeńde biz 20 eldi mekendi kógildir otynǵa qosamyz, bar jumysty tııanaqty atqaryp jatqan «QazTransGaz Aımaq» aksıonerlik qoǵamynyń ónimdi isine rızashylyq bildirýge bolar. Eki jyl ishinde myń shaqyrymǵa jýyq qubyr tartylyp, tabıǵı gaz ótkizildi. Arshaly aýdanyndaǵy bes eldi mekenniń turǵyndary jelige qosyldy», dedi oblys ákimi Ermek Marjyqpaev tarıhı sátke oraılastyryp ótkizilgen saltanatty rásimde.
«Biz kópbalaly otbasymyz, úıimizge alǵashqylardyń biri bolyp gaz tartylǵanyna qýanyp otyrmyz. Memlekettiń qamqorlyǵyna myń alǵys», deıdi aýdan turǵyny Valerıı Semenkov.
2019 jyly óńirdiń 17 eldi mekenin gaz qubyryna qosý boıynsha jobalyq-smetalyq qujattama ázirlengen bolatyn. Sóz arasynda paıdalanýǵa berilgen «Arshaly» avtomattandyrylǵan gaz taratý stansııasynyń ótkizý qýaty saǵatyna 15000 tekshe metr ekendigin aıta ketelik. Barlyǵy 345 shaqyrymnan astam gaz jelisi tartylǵan. 2023 jyly aýdandy gazdandyrýdyń sońǵy kezeńi Jibek joly aýylynda júzege asyrylady. Bes gaz rettegish blokty pýnktterdi ornatý arqyly 230 shaqyrym gaz taratý jelileri iske qosylady.
Osylaısha, 2020-2023 jyldary aralyǵynda aýdan boıynsha 574,66 shaqyrym gaz qubyry paıdalanýǵa berilmek. Tabıǵı gaz 8230 turǵyn úıge jetkiziledi.