Qazaqstandyqtar Sandýǵash Kenjebaeva men Arýjan Saǵyndyqova jasóspirimder arasynda AQSh ashyq chempıonaty irikteý saıystarynyń fınalyna shyqty, dep habarlaıdy Egemen.kz QTF-ǵa silteme jasap.
Irikteý saıysynyń 4-raketkasy bolyp tirkelgen S.Kenjebaeva nıderlandtyq Marı Neıkampty tize búktirdi.
Birinshi partııada Sandýǵash 1:4 esebimen jeńilip jatyp, tarazy basyn teńestire bildi. Sosyn taı-breıkte sátti oınady – 7:6 (8:6).
Ekinshi sette 5:0 esebimen alǵa ketip, matchty jeńispen túıindedi – 6:2.
Kenjebaeva irikteý saıystarynyń fınalynda Polsha ókili Veronıka Evaldpen sheberlik baıqasady.
Taǵy bir qazaqstandyq, irikteý saıystarynyń 1-raketkasy Arýjan Saǵyndyqova japonııalyq Harýka Hasegavamen kezdesti. Birinshi partııada Arýjan 6:4 esebimen basym tússe, ekinshisinde qarsylasy ese qaıyrdy - 6:3.
Sýper taı-breıkte qazaqstandyq tennısshi jeńisti julyp aldy – 10:7.
Saǵyndyqova irikteý saıystarynyń fınalynda amerıkalyq Djýletta Parehamen kezdesedi.