3 qyrkúıekten beri 200-ge jýyq órt sóndirýshi Zerendi aýdanyndaǵy orman órtin sóndirip jatyr, dep habarlaıdy Egemen.kz oblystyq TJD baspasóz qyzmetine silteme jasap.
200-ge jýyq órt sóndirýshi men ormanshylar, erikti órt sóndirý quramalary, azamattyq qorǵaý akademııasynyń kýrsanttary Zerendi aýdanyndaǵy orman órtin sóndirýde. Aqmola oblysynyń ákimi Ermek Marjyqpaev pen TJD bastyǵy polkovnık Nurlan Atyǵaev tótenshe jaǵdaı ornynda.
«3 qyrkúıek 20 saǵat 05 mınýtta «Kókshetaý» MUTP Zerendi fılıalynda órt shyqqany týraly habarlama kelip tústi. Oblys ákimi Ermek Boranbaıulynyń nusqaýy boıynsha oblystyq jedel shtab quryldy. Oqıǵa ornyna dereý Atbasar, Sandyqtaý jáne Zerendi órt sóndirý bólimderiniń kúshteri men quraldary jiberildi. Sondaı-aq Kókshetaý qalasynyń órt sóndirý bólimderinen jıyntyq jasaq jasaqtalyp, 30 adamnan turatyn jeke quram jiberildi. 15 m/s ekpindi jel kezinde órtti azaıtý múmkin boldy. О́rt túngi saǵat 00:00-de aýyzdyqtaldy. Qazir orman ishindegi shópti sóndiremiz. Jaǵdaı baqylaýda», dedi óńirdiń TJD bastyǵy Nurlan Atyǵaev.
Aldyn ala aqparat boıynsha, órt dala jolynan taraǵan. О́rtti joıý jumystary jalǵasýda. О́rttiń eldi mekenderge ótý qaýpi joq. Adam shyǵyny men jaraqat alǵandar tirkelmedi.