Indýstrııa jáne ınfraqurylymdyq damý mınıstri Qaıyrbek О́skenbaev Úkimet otyrysynda aldaǵy jylytý maýsymyna daıyndyq barysy týraly baıandady, dep habarlaıdy Egemen.kz.
IIDM basshysy aldaǵy jylý berý maýsymyna sapaly jáne ýaqytyly daıyndalý úshin mınıstrlik aldyn ala jumys josparyn bekitkenin, sonymen birge josparǵa sáıkes ákimdikter 1 qyrkúıekke deıin bilim berý obektileriniń 100% daıyndyǵyn qamtamasyz etýi, al 15 qazanǵa deıin kommýnaldyq sharýashylyq pen áleýmettik sala obektilerin, turǵyn úıler boıynsha daıyndyq jumystaryn aıaqtaýy qajet bolatynyn atap ótti.
Nátıjesinde, 1 qyrkúıekke deıin bilim berý nysandarynyń 99%-y jylytý maýsymyna daıyn. Nur-Sultan qalasynda, Jambyl jáne Soltústik Qazaqstan oblystarynda 25 nysan ázirge qysqa daıyn emes.
Sonymen qatar densaýlyq saqtaý nysandarynyń 98 paıyzy, turǵyn úılerdiń 88%-y, avtonomdy qazandyqtardyń 97%-y, jylý jelileriniń 94%-y, sýmen jabdyqtaý jáne sý burý jelileriniń 86%-ynyń daıyndyq deńgeıi oıdaǵydaı júrip jatyr.
Q.О́skenbaevtyń aıtýynsha, birqatar óńirdiń, ásirese jańadan qurylǵan oblystardyń ákimdikteri ınjenerlik ınfraqurylymdy, áleýmettik sala obektilerin jáne turǵyn úılerdi jylytý maýsymyna ýaqytyly daıyndaý boıynsha sharalardy kúsheıtýleri qajet.
Mınıstr sondaı-aq otyn daıyndaý boıynsha jumys nátıjeleri týraly aıtty. Atap aıtqanda, avtonomdy qazandyqtar úshin 1 mln tonna kómir jáne 14 myń tonna mazýt nemese qajettiliktiń 81 jáne 88% daıyndalǵan. Almaty, Aqmola, Qaraǵandy jáne Pavlodar oblystarynda otyndy baıaý satyp alý úrdisi baıqalady. Sondyqtan atalǵan óńirlerdiń jergilikti atqarýshy organdary shuǵyl sharalar qabyldaýy qajet.
«IIDM turǵyndar men kommýnaldyq-turmystyq sektordyń kómirmen qamtamasyz etilýin únemi óz baqylaýynda ustap otyrady. Jedel derekter boıynsha, qańtar-shilde aılarynda 66,4 mln tonna kómir óndirilgen. Bul ótken jyldyń sáıkes kezeńiniń kórsetkishine 106 paıyzdy qurap otyr. Sonymen qatar kommýnaldyq-turmystyq qajettilikterge jáne halyq ıgiligine shamamen 4,5 mln tonna, energııa óndirýshi kásiporyndarǵa 35 mln tonna, ónerkásiptik kásiporyndarǵa 4,2 mln tonna tıeldi. Al, eksportqa 19 mln tonna jóneltildi. Jalpy, barlyq óńirde kómirdiń jetkilikti qory jınaqtalǵan, temir joldar kómirdi tolyq kólemde tasymaldaýdy qamtamasyz etýde», dedi mınıstr.
Halyq arasynda kómir satyp alý qarqynynyń tómen deńgeıde bolýy ózekti másele bolyp otyr. Razrezder men qoımalarda kómir jetkilikti mólsherde bolýyna, sondaı-aq memlekettik organnyń ótken jylǵy otyn qunyn saqtap qalý sharalaryn qoldanǵanyna qaramastan, qazirgi tańda halyq tutynatyn kólemniń tek 31 paıyzy ǵana satyp alyndy.
Q.О́skenbaev atap ótkendeı, jylytý maýsymynyń oıdaǵydaı ótýi úshin mınıstrlik qosymsha sharalar qabyldaýda. Atap aıtqanda:
– kómirdi tasymaldaý úshin «Qazaqtemirtrans» AQ vagondar parkin ulǵaıtý;
– bırja arqyly kómirdi satý úlesin 50%-ǵa deıin arttyrý, bul ónimdi deldaldarsyz satyp alýǵa múmkindik beredi;
– kórshi memleketterge áleýmettik kómir shyǵarýdy shekteý.
«Ákimdikter nysandardy belgilengen merzimde daıyndaý boıynsha barlyq jóndeý jumystarynyń oryndalýyn baqylaýdy qamtamasyz etýi tıis. Sondaı-aq ónim tapshylyǵyn boldyrmaý maqsatynda kómir jetkizýshilermen belsendi ózara is-qımyl jasaýy, monopolııaǵa qarsy vedomstvonyń aýmaqtyq bólimshelerin tartý arqyly kommýnaldyq-turmystyq qajettilikter men turǵyndar úshin kómir baǵasynyń zańsyz ulǵaıýyn boldyrmaý boıynsha sharalar qabyldaýy qajet», dep atap ótti IIDM basshysy.