Indýstrııa jáne ınfraqurylymdyq damý mınıstri 15 qazanǵa deıin kommýnaldyq sharýashylyq pen áleýmettik sala obektilerin jáne turǵyn úılerdiń qysqa daıyndyq jumystaryn aıaqtaýdy tapsyrdy, dep habarlaıdy Egemen.kz.
Búgin Indýstrııa jáne ınfraqurylymdyq damý mınıstri Qaıyrbek О́skenbaev Úkimet otyrysynda QR Premer-mınıstri Álıhan Smaıylovqa aldaǵy jylytý maýsymyna daıyndyq barysy týraly aıtyp berdi.
«Elimizdegi bilim berý nysandarynyń 99%-y bıylǵy jylytý maýsymyna daıyn», dedi mınıstr.
Sondaı-aq ol Nur-Sultan qalasynda, Jambyl jáne Soltústik Qazaqstan oblystarynda 25 nysan ázirge qysqa daıyn emes ekenin moıyndady.
Al densaýlyq saqtaý nysandarynyń 98 paıyzy, turǵyn úılerdiń 88%-y, avtonomdy qazandyqtardyń 97%-y, jylý jelileriniń 94%-y, sýmen jabdyqtaý jáne sý burý jelileriniń 86%-ynyń daıyndyq deńgeıi oıdaǵydaı kórinedi.
Qaıyrbek О́skenbaevtyń aıtýynsha, birqatar óńirdiń, ásirese jańadan qurylǵan oblystardyń ákimdikteri ınjenerlik ınfraqurylymdy, áleýmettik sala obektilerin jáne turǵyn úılerdi jylytý maýsymyna ýaqytyly daıyndaý boıynsha sharalardy kúsheıtýleri qajet.