Tótenshe jaǵdaı mınıstrliginiń shuǵyl áreket etý shtaby Áýlıekól aýdanyndaǵy eldi mekenderge alapat órtten tóngen qaýiptiń joıylǵanyn málimdedi. О́rt sóndirý jasaqtary orman ishindegi shala byqsyǵan qolamtalardy sóndirip jatyr. Amanqaraǵaı, Lesnoe, Ozernoe, Baǵanaly aýyldaryna órt qaraýyldaý qyzmeti qoıylǵan.
Sınoptık mamandar 6 qyrkúıekke qaraǵan túni jeńil sebelep ótken soqyr jaýynnyń áserinen órt shalǵan aýmaqtaǵy aýa ylǵaly birshama arta túskenin aıtady. Degenmen qaýiptiń beti tolyq qaıtty deýge áli de erte. Áýeden barlaý qyzmetiniń málimetinshe, Ozernoe, Lesnoe jáne Amanqaraǵaı aýyldarynyń mańaıyndaǵy jaǵdaı tynysh. Biraq Baǵanaly aýyly men Qazanbasy eldi mekeniniń ortasyndaǵy uzyndyǵy shamamen 2 shaqyrymdaı aýmaq áli de órtenip jatyr. Sondyqtan órtke qarsy negizgi kúsh-qural osy mańaıǵa toptastyrylǵan. Qorǵanys mınıstrligi men jergilikti atqarýshy organdardyń ınjenerlik tehnıkalary ormanǵa jaqyn eldi mekenderdiń aınalasyn jyrtyp jatyr.
5 qyrkúıekte Baǵanaly aýylyna jaqyn ornalasqan ormanda órt shyǵyp edi, abyroı bolǵanda tilsiz jaý der kezinde aýyzdyqtaldy. О́rt kezinde aýyl turǵyndary túgeldeı Qazanbasyǵa kóshirilgen. Biraq qyzyl jalyn kúshti jeldiń ekpinimen Qazanbasyǵa da jaqyndap barǵanda jurt kádimgideı úreılenip qalǵan.
– Biz jaqtaǵy órt sóndi. Baǵanaly aman. Keshe bizdiń aýylǵa da jaqyn kelip edi. Túnimen áskerıler men aýyl adamdary jabylyp júrip sóndirdi. Tańerteń bárimiz qýanyp jatyrmyz. Bizdiń aýylǵa evakýasııalanǵan Baǵanaly turǵyndary birtindep úılerine qaıtyp jatyr. Ol kisilerge jetkilikti túrde azyq-túlik berildi, – dedi Qazanbasy aýylynyń turǵyny Dınara Syzdyqova.
Al Amanqaraǵaı turǵyndarynyń aıtýynsha, aýylda 106 úı janyp ketken. «Baǵanaly, Novonejen, Ozernyı, Lesnoe, Qazanbasynyń mańaıyn túgel órt sharpyp ketti. Qazir qaýiptiń beti qaıtqandaı boldy. Keshe Memleket basshysy Qasym-Jomart Toqaev kelip, halyqpen kezdesip, eldiń eńsesin kóterip ketti. Prezıdent baspanasyz qalǵandarǵa eki-eki jarym aıdyń ishinde úı salyp beremiz dep ýáde etti. Bul úıler memleket pen demeýshiler esebinen salynatyn bolady. Árqaısysynyń aýdany – 100 sharshy metrdi quraıdy. Eń bastysy, bul úıler as úı, ydys-aıaq, teledıdar, jıhazdarmen jabdyqtalatyn boldy. Biraq halyq bir nársege rıza emes. Jergilikti bılik ol úılerdi Áýlıekóldegi ýchılısheniń artyndaǵy sazdaýyt jerge salý týraly sheshim qabyldapty. Qazir ol jerge ártúrli tehnıkalar kelip, jer tegisteý jumystaryn bastap jatyr. Búgin halyq ákimdikke baryp, ol jaqqa turǵysy kelmeıtinin jetkizdi», deıdi aýyl turǵyndary.
Oblys ákiminiń birinshi orynbasary Ǵaýez Nurmuhambetovtiń aıtýynsha, Prezıdent tapsyrmasymen salynatyn turǵyn úılerdi belgilengen qysqa merzim ishinde sapaly turǵyzyp, halyqqa tapsyryp úlgerý úshin qurylysqa iri kompanııalar tartylatynyn aıtty.
– Qazirgi eń basty mindet – kún sýymaı turyp úısiz-kúısiz qalǵan otbasylardy tezdetip baspanamen qamtyp, jyly jerge ornalastyrý. Al jańa salynǵan úılerde turǵysy kelmeıtin turǵyndardyń talaby ret-retimen sheshiletin bolady, – dedi oblys ákiminiń orynbasary.
Shuǵyl áreket etý shtabynyń sońǵy málimetinshe, Amanqaraǵaı aýylynda – 85, Ozernyıda 6 úı órtenip ketken. О́rt bastalǵaly 2091 adam evakýasııalanǵan: 3 qyrkúıekte Amanqaraǵaı, Ozernyı jáne Lesnoe aýyldarynan 1841 adam shyǵarylsa, 5 qyrkúıekte Baǵanaly aýylynyń 250 turǵyny Qazanbasyǵa kóshirilgen. Qazir Áýlıekól orta mektebi men Áýlıekól mektep-ınternatynda 66 adam jatyr. Evakýasııalanǵan turǵyndardyń deni óz úılerine oralǵan, birazy jaqyn týystarynyń úıin panalap otyr.
«О́rt kezinde ár túrli dárejede kúıik shalyp, ys tıgen 11 adam – 6 turǵyn, 1 ákimdik qyzmetkeri, 1 orman sharýashylyǵynyń jumysshysy, 3 tótenshe jaǵdaı qyzmetkeri anyqtalǵan edi, búginde olardyń bári aýrýhanadan shyǵyp, úılerine oralǵan. О́kinishke qaraı, Amanqaraǵaıda úıindiniń astynan M.I. Babenko esimdi 87 jastaǵy qarııanyń múrdesi tabyldy. О́rt sóndirý jumystary jalǵasýda», dep málimdedi shuǵyl áreket etý shtabynyń ókilderi.
Oblystyq polısııa departamenti óńirdi orasan shyǵynǵa ushyratqan orman órtine qatysty qylmystyq kodekstiń eki baby boıynsha is qozǵap, órttiń shyǵý sebepterin anyqtaý jumystaryn bastap ketti. Sondaı-aq oblys ákimi Áýlıekól jáne Qarasý aýdandarynda tabıǵı sıpattaǵy tótenshe jaǵdaı jarııalady.
Elimizdiń ár óńirinen órtten zardap shekkenderge arnalǵan gýmanıtarlyq kómek tolassyz aǵylyp kelip jatqanyn aıta ketken jón. Elden jıylyp jatqan jylýdyń kerek jerine jetýin baqylap, uıymdastyrý sharalaryn atqarý úshin oblystyq máslıhattyń janynan arnaıy jumys toby quryldy.
Sondaı-aq Amanat partııasynyń barlyq óńirlik fılıaldarynda órtten zardap shekkenderge gýmanıtarlyq kómek qabyldaý pýnktteri ashylyp, partııalyqtar men «Jastar Rýhy» jastar qanatynyń múshelerinen volonterler toby quryldy.
Qostanaı oblysy